Mańǵystaý kásipkerleri tuńǵysh ret halyqaralyq irimshik baıqaýynda Qazaqstan namysyn qorǵaıdy

AQTAÝ. QazAqparat - Túpqaraǵan aýdanyndaǵy «Jeti laq» fermasynyń negizin qalaýshy Kobzevter otbasy eshki men túıe sútinen irimshik ónimderin shyǵarýmen aınalysady. Bıyl olar Mondial du fromage-2023 halyqaralyq irimshik baıqaýyna qatysady, dep habarlaıdy QazAqparat Mańǵystaý oblysy ákiminiń baspasóz qyzmetine silteme jasap.

Erekshe atap ótetin jaıt, bul halyqaralyq konkýrsqa Qazaqstannan úmitkerler buryn sońdy qatyspaǵan.

Osy jóninde jáne irimshik óndirisiniń múmkindikteri týraly kásipkerler óńir basshysy Nurlan Noǵaevqa Túpqaraǵan aýdanyna jumys sapary kezinde aıtyp berdi.

Mańǵystaýlyq «Jeti laq» fermasy Le mondial du fromage-2023 halyqaralyq irimshik baıqaýynda Qazaqstannyń ónimderin tanystyrady.

Bul - qazaqstandyqtardyń konkýrs uıymdastyrýshylarynan akkredıtatsııa alǵan alǵashqy jaǵdaı.

2020 jyldan bastap jumys isteıtin «Jeti laq» fermasy Túpqaraǵan aýdanyndaǵy Aqshuqyr aýylynda ornalasqan.

Kásipkerler pasterlengen eshki sútin, ıogýrt, aıran, súzbe, qaımaq jáne irimshiktiń 12 túrin shyǵarady.

Kobzevter otbasy aıyna 3,5 tonna eshki sútin óndiredi. Ferma 10 ga jerdi alyp jatyr, onyń tórt gektary eshki ósirýge arnalsa, qalǵan aımaqta jem-shóp qoımasy men sút óńdeý tsehy ornalasqan.

- Bıyl biz óndiristi damytýǵa baǵyttalǵan qaıtarymsyz 5 mln teńge grant utyp aldyq. Sonymen qatar, «Aýyl amanaty» baǵdarlamalarynyń qatysýshylarymyz. Aýyl sharýashylyǵy kásipornyn óz aqshańa damytý óte qıyn, osy turǵyda memleket aýyl sharýashylyǵy óndirýshilerine kóńil bólip, qoldaý kórsetip otyrǵany qýantady. Bıyl biz úshin mańyzdy oqıǵa - Mondial du fromage-2023 halyqaralyq irimshik baıqaýyna qatysý. Onda biz óz ónimderimizdi tanystyramyz. Aıta ketý kerek, elimiz táýelsizdik alǵaly beri Qazaqstan alǵash ret álemdik irimshik jasaýshylar baıqaýyna óz ónimin usynbaq, - dedi irimshik daıyndaýshy Aleksandra Grıgolova.

Óńir basshysy Nurlan Noǵaev kásiporynnyń jetistigi men Mańǵystaý irimshik óndirýshileriniń áleýeti zor ekenin atap ótti.

- Mańǵystaýda óndiriletin qazaqstandyq irimshikter jaqyn arada otandyq eksportty damytýdyń negizgi draıveri bola alady. Sizderdiń halyqaralyq deńgeıdegi baıqaýda elimizdi tanystyrý múmkindigine ıe bolǵanyńyz qýantady. Sizderge sáttilik tileı otyryp, kásipkerlerdiń bastamalaryn qoldaýǵa árqashan daıyn ekenimizdi aıtqym keledi - dep atap ótti Nurlan Noǵaev.

Frantsııalyq Le Mondial du fromage baıqaýy qyrkúıek aıynyń 10-12 aralyǵynda Týr qalasynda ótedi.

Eýropada ótetin bul halyqaralyq is-shara - sút ónimderin shyǵarýshy kásipkerler óz ónimderin usyna alatyn joǵary deńgeıdegi alań.