Mańǵystaý ІІD basshylyǵy Danııar Álimbaevtyń ólimine qatysty isti óz baqylaýyna aldy
AQTAÝ. QazAqparat - Mańǵystaý oblystyq ІІD-niń basshysy Kóńildi jáne tapqyrlar klýbynyń burynǵy múshesi Danııar Álimbaevtyń ólimine qatysty isti óz baqylaýyna aldy. Bul týraly departamenttiń baspasóz qyzmeti málim etti, dep habarlaıdy «Lada».
Danııar Álimbaevtyń isine qatysty QR QK-niń 99-baby 1 bóligi (Adam óltirý) boıynsha sotqa deıingi tergeý júrgizilýde.
«Sot-medıtsınalyq saraptama taǵaıyndalǵan, sonyń nátıjesi boıynsha is sotqa jiberiledi. Ustalǵandar qamaýǵa alynǵan. Jazadan eshkim qutyla almaıdy», - dep málim etti oblystyq ІІD-niń baspasóz qyzmeti.
Eske sala ketsek, 21 shildede Aqtaý qalasynyń 6-shaǵynaýdanynda Danııar Álimbaevqa shabýyl jasaldy. Kóńildi jáne tapqyrlar klýbynyń burynǵy múshesiniń sanyna pyshaq suǵyp alǵan. Dárigerler ony qutqaryp qala almady. Buǵan deıin osy qylmysqa qatysty degen kúdikpen úsh adamnyń ustalǵany habarlandy. Olar ýaqytsha ustaý abaqtysyna qamaldy.
