Mańǵystaý eriktileri úndeý jarııalady
Mańǵystaýlyq jastar qoǵamdyq jumystarǵa belsendi aralasýǵa shaqyrdy.
«Biz, Mańǵystaý eriktileri, jalpyǵa ortaq múddeni bildire otyryp úndeý joldaımyz! Biz sekildi jalyndy jastardy ulan-baıtaq Uly dala – táýelsiz Otanymyzdyń jarqyn bolashaǵyna degen selkeýsiz senim, úmit pen júgi zor jaýapkershilik Uly maqsat tóńiregine toptastyrady. Damýdyń dara dańǵylyna túsken elimizdi búgingiden de qýatty memleketke aınaldyrý – barshamyzǵa ortaq qasıetti paryz. Byltyr ult kóshbasshysy Elbasy bastamasymen jarııalanǵan Jastar jyly elimizdiń túkpir-túkipirinde talaby zor, yntasy mol jas býyn ókilderiniń jappaı qyzý qoldaýyna ıe bolyp, jemisti júıeledik. Al jańa 2020 jyldy «Volonter jyly» retinde ataýda zor astar jatyr degen oı túıemiz. Osy oraıda, «Volonter jyly» aıasynda ár túrli salada eńbek etip júrgen volonterlyq uıymdardyń júıeli túrde birlese qyzmet atqaryp, qoǵamdyq jumystarǵa belsene at salysýy búgingi kúnniń qajettiligi dep bilemiz», delingen úndeýde.
Mańǵystaýlyq eriktiler óńirimdegi barlyq eriktilerdi qaıyrymdylyq jasaýǵa shaqyrdy.
«Óńirimizdiń barlyq eriktiler qozǵalystaryn Otanymyzdyń gúldenýine, azamattardyń ómir súrý sapasyn arttyrýǵa, jaqsylyq jasap jarysýǵa, qaıtarymsyz qaıyrymdy is qylýǵa, aýyldardy abattandyrý jumystaryna belsendi qatysýǵa, ekologııalyq bastamalardy qoldaý, balalardy qorǵaý, áleýmettik osal toptarǵa kómek kórsetý jolynda qatarymyzǵa qosylýǵa jáne óńir jurtshylyǵyn eriktiler uıymdaryna qoldaý kórsetýge shaqyramyz! Biz, Mańǵystaý eriktileri - barlyq kúsh-jigerimizdi birligimizdi saqtaýǵa, Otanymyz - Qazaqstan Respýblıkasynyń órkendeýine jáne halyq ıgiligi úshin jumsaıtyndyǵymyzdy atap ótemiz!», - delingen jastar úndeýinde.
