Mańǵystaý densaýlyq saqtaý basqarmasy burynǵy basshysynyń jaza merzimi qysqartyldy
AQTAÝ. QazAqparat - Mańǵystaý oblystyq sotynyń qylmystyq ister jónindegi sot alqasynda densaýlyq saqtaý basqarmasynyń burynǵy basshysy Maral Qadyrdyń isi qaraldy, dep habarlady «QazAqparat» HAA tilshisi.
Basqarmanyń burynǵy basshysy Maral Qadyrǵa ózine baǵynysty qyzmetkerlerinen aqshalaı qarajatty bopsalaǵan 4 fakti dáleldengennen keıin Aqtaý qalalyq sotynyń sýdıasy 5 mamyrda múlkin tárkileı otyryp, jalpy rejimdegi kolonııada jazasyn óteýmen 7 jylǵa bas bostandyǵynan aıyrý úkimin shyǵardy. Úkim jumsartatyn jaǵdaılardy (Sottalýshynyń kámelettik jasqa tolmaǵan qyzy bar) esepke alyp, shyǵaryldy.
«Maral Qadyr QR QK 366-baby 3-bóliginiń 1, 4-tarmaqtary boıynsha sottaldy. Sot qaýlysymen Atyraý qalalyq sotynyń 2017 jylǵy 5 mamyrdaǵy úkimi ózgertildi. QK 55-baby 4-bóligin qoldana otyryp, oǵan 5 jylǵa bas bostandyǵynan aıyrý túrinde jaza taǵaıyndaldy. Úkimniń qalǵan bóligi ózgerissiz qaldy. Sottalýshy men onyń qorǵaýshysynyń appelıatsııalyq shaǵymy, prokýrordyń apellıatsııalyq narazylyǵy qanaǵattandyrýsyz qaldy», - dep atap ótti Mańǵystaý oblystyq soty baspasóz qyzmetiniń ókili Gaýhar Nurhanova.
Sot úkimimen M. Qadyr QR QK 366-babynyń joǵaryda kórsetilgen tarmaqtary men bólikteri boıynsha aıypty dep tanylǵanyn atap ótken jón. Qylmystyq jazalaý men jeke múlkin tárkileýden tys sottalýshy ómir boıyna belgili bir laýazymdy atqarý quqyǵynan aıyrylady.
Sot qaýlysy kúshine endi.
