Mańǵystaý beıpartııalyq baıqaý ortalyǵynyń saılaýǵa daıyndyǵy qandaı
Mańǵystaý oblysy boıynsha saılaýdy beıpartııalyq baıqaý ortalyǵynyń jetekshisi Bekbol Orynbasarov saılaý protsesinde baıqaýshylardyń bolýy asa mańyzdy ekenin atap ótip, olardyń daıyndyq barysy jaıynda aqparat berdi.
Onyń aıtýynsha, saılaý aldyndaǵy kezeńde jáne daýys berý kúninde baqylaýshylardyń qyzmetin úılestirý úshin shtab qurylǵan.
Baıqaýshylar oblys boıynsha barlyq saılaý ýchaskesine qatysady. Baıqaýshylardyń jumysyna Mańǵystaý oblysynyń Azamattyq alıansy men Qazaqstan kásipodaqtar federatsııasy jáne ózge de qatysýǵa ótinish bildirgen úkimettik emes uıymdar qatysady.
«Qazaqstan Respýblıkasy Parlamenti Májilisi men barlyq deńgeıdegi máslıhattar saılaýynda Mańǵystaý oblysy boıynsha barlyq saılaý ýchaskelerine baıqaýshylar qatysady. Baıqaýshylardy daıarlaý jáne oqytý Mańǵystaý oblysynyń barlyq 5 aýdanynda, sondaı-aq Aqtaý jáne Jańaózen qalalarynda júrgizildi. Ár baıqaýshynyń mıssııasy - saılaý ýchaskelerinde qoljetimdi ınfraqurylymdy qaraý, zań buzýshylyqtar anyqtalǵan jaǵdaıda olardy tirkeý jáne jolyn kesý», - dedi B. Orynbasarov brıfıngte.
Qazirgi epıdemıologııalyq jaǵdaıǵa baılanysty baıqaýshylardy jeke qorǵanys quraldarymen qamtamasyz etýge erekshe nazar aýdarylady.
Shtab qurylǵan sátten bastap óńirdiń qoǵam qaıratkerlerimen, saıası partııalardyń, qoǵamdyq birlestikter men qozǵalystardyń ókilderimen kezdesýler ótkizildi.
«Táýelsiz baıqaýshylar saılaý protsesindegi jumystarǵa ózi tikeleı aralaspaıdy. Negizgi mindeti – saılaý protsesin baıqaý. Eger baıqaýshy sol jerde oryn alǵan zańsyzdyqty kóretin bolsa, ol sol jerde akt toltyrýǵa quqyly. Ol saılaý jónindegi zańnyń baptarynda kórsetilgen», - dedi Mańǵystaý oblysy boıynsha saılaýdy beıpartııalyq baıqaý ortalyǵynyń jetekshisi.
Aıta keteıik, qoǵam qaıratkeri Aıgúl Soloveva «Saılaýda beıtarap jáne shynaıy baıqaý týraly» Hartııa qurý ıdeıasyn aıtqan bolatyn.
Atalǵan ıdeıa Mańǵystaý óńirinde de qoldaý taýyp, saılaýdy beıpartııalyq baıqaý ortalyǵy quryldy.
