Mańǵystaý, Atyraý oblystarynyń túlekteri úshin 10 myń grant bólinedi

NUR-SULTAN. QazAqparat – Bıyl Mańǵystaý, Atyraý oblystarynyń túlekteri úshin 10 myń grant bólinedi. Bul granttar boıynsha atalmysh óńir túlekteri kez kelgen oblysta bilim alýǵa quqyly. Tek dıplom alǵan soń týǵan ólkesine oralýy kerek, dep habarlaıdy QazAqparat tilshisi.

Úkimet otyrsynda Bilim jáne ǵylym mınıstri Ashat Aımaǵambetov osyndaı aqparat berdi.

«2022 jyly granttar sany 10% artady. Buǵan qosa tehnıkalyq mamandyqtarǵa arnalǵan granttardyń úlesi 40%-dan 60%-ǵa deıin ulǵaıtylady. Sondaı-aq, aýyldyq kvota da bıyl 35%-ǵa deıin ulǵaıtylady.

Bilim sapasy jaǵynan alshaqtyǵy bar óńirlerdiń abıtýrıentterine tehnıkalyq baǵyttary boıynsha qosymsha 10 000 nysanaly grant bólinetin bolady. Biz taldaý júrgizip, óńirlerdi anyqtadyq. Bul – Mańǵystaý, Atyraý oblystary. Josparǵa sáıkes stýdentter elimizdiń jetekshi joǵary oqý oryndarynda bilim alatyn bolady. Sondaı-aq, oqý aıaqtalǵan soń turǵylyqty jerlerine baryp óteý kózdeledi», - dedi mınıstr.

Onyń aıtýynsha, ekonomkalyq mamandyqtardyń bakalavrıattaryn daıyndaý merzimi qysqarýy múmkin.

«Ekonomıka úshin kadrlardy jedel daıarlaý úshin bıyl pılottyq rejımde 2,5-3 jyl oqytýmen qoldanbaly bakalavrıat engizile bastalady.

Joǵarǵy bilim berýde «onlaın-oqytý» jańa nysanyn engizý josparlanýda. Tıisti zań jobasy Májiliste qaralýda. Bul tsıfrlandyrý zamanynyń suranysyna saı keletin shara», - dedi Ashat Aımaǵambetov.