Mańǵystaý atom energetıkalyq kombınaty memleket menshigine qashan beriledi
«Biz «MAEK-Qazatomónerkásip» kompanııasyn memleket menshigine berý jónindegi jumys tobyn qurý úshin bastama kóterdik. Energetıka mınıstrligi memlekettik organdarmen birlesip, Sizdiń (QR Premer-Mınıstri Asqar Mamın - avt.) tıisti ókimińizdiń jobasyn qarastyryp jatyr. Jumys tobyn qurýdy, sondaı-aq, MAEK-ty (Mańǵystaý atom energetıkalyq kombınaty - avt.) memlekettik menshikke berý boıynsha qaýly jobasyn memlekettik organdarmen kelisýdi tezdetý qajet dep sanaımyz», - dedi A.Esimov Úkimettiń búgingi otyrysynda.
Aıta keteıik, Ahmetjan Esimov qordyń sheteldegi aktıvterin buǵattaý máselesin de kóterdi.
«Ókinishke qaraı, aktıvterge tyıym salýyna baılanysty sheteldik ıýrısdıktsııalardaǵy sot protsesterine qordy udaıy tartý praktıkasy beleń alyp otyr. Atap aıtqanda, 2017 jyly Statı talaptary boıynsha qorǵa tıesili quny 5 mıllıard AQSh dollarynan asatyn Qashaǵan aktsııalaryna shekteý qoıyldy. Al 2018 jyly Aqtaý Petroldyń respýblıkaǵa qoıǵan talaptary boıynsha qorǵa tıesili quny 38 mıllıon AQSh dollaryn quraıtyn Túrkııadaǵy Shekerbank aktsııalaryna buǵaý salyndy. Ony bárińiz jaqsy bilesizder. Qordyń aktıvterine buǵattaý qaýpi jalpy bizdiń aktıvterimizdiń ınvestıtsııalyq tartymdylyǵyna aıtarlyqtaı jaǵymsyz áser etýde», - deıdi A.Esimov.
Osyǵan baılanysty qor basshysy arnaıy mexanızmdi tezdetip engizýdi usyndy. Sonyń arqasynda qordyń aktıvterin qorǵaýǵa bolady.
«Buny men tek Roman Vasılevıchke (QR Indýstrııa jáne ınfraqurylymdyq damý mınıstri - avt.) ǵana emes, basqa da jigitter osy máseleniń biz úshin qanshalyqty mańyzdy ekenin jaqsylap túsinsin degenim ǵoı. Osyǵan baılanysty biz ádilet jáne qarjy mınıstrlikterinen Qazaqstan Respýblıkasyna qarsy shyǵarylǵan xalyqaralyq protsester boıynsha sheshimderdi oryndaý mexanızmin ázirleýdi usynǵan edik. Ondaı mexanızm bolsa, ol arqyly ulttyq qordyń, kvazımemlekettik sektordyń aktıvterin buǵattaýdan qorǵanýǵa bolady», - dep atap kórsetti A.Esimov.
Foto: www.aktau-business.com
