Mańǵystaý álemdik deńgeıdegi kólik-tranzıt torabyna aınalady - Qasym-Jomart Toqaev
Qasym-Jomart Toqaevtyń paıymynsha, Mańǵystaý – geografııalyq turǵydan utymdy jerde ornalasqan óńir. Bul ólkeni álemdik deńgeıdegi kólik-tranzıt torabyna aınaldyrý kerek.
«Portty qala Aqtaý – Qazaqstannyń teńizge shyǵatyn qaqpasy. Jahandyq logıstıkalyq júıe qaıta qalyptasyp jatqan qazirgi kezde Kaspıı teńiziniń mańyzy kúrt arta tústi. Porttyń ınfraqurylymyn damytý úshin ınvestıtsııa tartýdy, konteınerlik jáne kólik-logıstıkalyq hab qurýdy kózdep otyrmyz», - dedi ol.
Memleket basshysy qazirgi álemdik naryqtaǵy ahýaldy eskerip, Transkaspıı baǵdaryn odan ári damytý óte mańyzdy ekenin alǵa tartty.
«Osy másele boıynsha seriktes eldermen ózara túsinistik bar. Aqtaý jáne Quryq porttarynyń qýatyn arttyratyn boldyq. Bul olardyń ótkizý múmkindigin jetildirip, munaı tasymaldaý kólemin jylyna 20 mıllıonǵa deıin jetkizý úshin qajet», - dedi Prezıdent.
Qasym-Jomart Kemeluly aımaqtaǵy avtomobıl joldarynyń sapasyn jaqsartýǵa erekshe mán beriletinin de málimdedi. Ol buǵan deıin «Beıneý-Shalqar» tas joly qurylysynyń mańyzdylyǵy jóninde aıtqanyn eske saldy.
»Jumys óte baıaý júrip jatyr. Úkimetke qurylysty bastaý úshin qajetti qujattardy jedel daıyndaýdy tapsyramyn. Óńir turǵyndary oblystyq deńgeıdegi joldyń sapasy jóninde jıi shaǵym aıtady. Úkimet ákimdikpen birlesip, «Aqtaý – Fort-Shevchenko», «Taýshyq-Shetpe» joldaryn jóndeýge kelesi jyldan bastap kirisýi kerek. Jol sapasy – ár aımaqtyń damý deńgeıin aıqyndaıtyn basty kórsetkishtiń biri. Azamattar damýdyń nátıjesin jınalystarda emes, kúndelikti ómirde kórip, sezinýi qajet. Sondyqtan ekonomıkanyń turaqty damýyna tyń serpin berý úshin oblystyń ınvestıtsııalyq áleýetin arttyrǵan jón», - dedi Memleket basshysy.