«Mańǵystaý-Aqtóbe» poıyzyndaǵy órtten zardap shekken eki adam aýrýhanadan shyqty

AQTAÝ. QazAqparat - «Mańǵystaý-Aqtóbe» jolaýshylar poıyzynyń júk tıelgen vagonynda bolǵan órtten zardap shekken eki adam aýrýhanadan shyqty, dep habarlaıdy QazAqparat tilshisi.

Mańǵystaý oblystyq densaýlyq saqtaý basqarmasynyń baspasóz qyzmetiniń habarlaýynsha, oqıǵa kezinde 1985 jáne 1982 jyly týǵan er adamdar denesiniń 30 jáne 20 paıyzyn kúıik shalǵan. Naýqastardyń jaǵdaıy jaqsarǵan soń úılerine jiberildi.

Al, osy órtten denesiniń 40 paıyzyn kúıik shalǵan 1989 jyly týǵan azamat pen onyń 11 jasar uly Mańǵystaý oblystyq aýrýhanasyna em qabyldap jatyr.

Buǵan deıin órtten zardap shekken balanyń beti beri qaraǵany týraly jazǵan bolatynbyz. Al, osy órtten denesiniń 80 paıyzyn kúıik shalǵan er adam kóz jumdy.