Mańǵystaý ákimi turǵyndardy baspanamen qamtamasyz etýge sóz berdi
ASTANA. QazAqparat - 2025 jyly árbir mańǵystaýlyq 30 sharshymetr baspanamen qamtamasyz etiletin bolady. Bul týraly búgin Ortalyq kommýnıkatsııalar qyzmetindegi baspasóz máslıhatynda Mańǵystaý oblysynyń ákimi Eraly Toǵjanov aıtty, dep habarlaıdy QazAqparat.
«Ótken jyly 833 myń sharshy metr turǵyn úı paıdalanýǵa berildi. Bul 2016 jylmen salystyrǵanda 18 paıyzǵa joǵary. Jeti myń otbasy baspanaly boldy. 2018 jyly 916 myń sharshy metr turǵyn úı paıdalanýǵa beremiz dep josparlap otyrmyz. Bir sózben aıtqanda búgingi kúni bir mańǵystaýlyqtyń baspanamen qamtylý kórsetkishi 23 sharshy metrdi quraıdy»,- dedi ol.
Osy rette oblys basshysy Qazaqstan Prezıdenti ár turǵyndy 30 sharshy metr baspanamen qamtamasyz etý tapsyrmasyn qoıǵanyn eske saldy.
«Eger biz jyl saıyn 10 paıyzdyq ósimmen baspana salyp otyrsaq, 2025 jyly 1 791 myń sharshy metrge deıin jetemiz. Bul sanǵa jetsek, ár azamatty 30 sharshy metr baspanamen qamtamasyz etýge múmkindik beredi. Biz oǵan senimdimiz. Ony júzege asyratyndyǵymyzǵa sizderdiń aldaryńyzda sóz berýge daıynmyn», - dedi E.Toǵjanov.
Aıta keteıik, Mańǵystaý oblystyq ákimdigi baspasóz qyzmeti usynǵan málimetke sáıkes, óńirde turǵyn úı kezeginde 18 myń adam, jer kezeginde 166 myń adam tur.
