Mańǵystaý ákimdiginiń Jobalyq ofısi 2021 jyldyń úzdigi atandy
Aıta ketsek, búgin Memleket basshysy Qasym-Jomart Toqaevtyń beınebaılanys rejıminde qatysýymen «Altyn sapa» jáne «Paryz» syılyqtarynyń ıegerlerin saltanatty túrde marapattaý rásimi ótken bolatyn.
Marapat aıasynda, Mańǵystaý oblysy ákimdiginiń janyndaǵy Jobalyq ofısi respýblıkalyq «Qazaqstan Project Management Awards 2021» jobalyq menedjmentti jetildirý konkýrsynyń «Jyldyń úzdik jobalyq ofısi» nomınatsııasy boıynsha jeńimpaz atanyp, QR Prezıdentiniń «Altyn sapa» syılyǵyn ıelendi.
Baıqaýǵa atalǵan nomınatsııa boıynsha ortalyq memlekettik organdar men jergilikti atqarýshy organdardyń 27 jobalyq ofısteri qatysqan. Bilikti sarapshy-asessorlardyń joǵary baǵasyn alǵan Mańǵystaý oblysy ákimdiginiń jobalyq ofısi – jyl úzdigi atandy.
Aıta ketsek, memlekettik josparlaý júıesinde jobalyq basqarýdy qurý týraly Mańǵystaý oblysynyń Jobalyq ofısi - 2020 jyly oblys ákiminiń «QR jergilikti jáne ózin-ózi basqarý» týraly zańyna sáıkes quryldy.
Ofıs - ulttyq jáne ózge de jobalardy ázirleý, olardyń iske asyrylýynyń jedel monıtorıngin qamtamasyz etý maqsatynda qyzmet etedi.