Mańǵystaý ákimdigi teńiz jaǵalaýyndaǵy 21 jer telimin sot arqyly qaıtaryp alady

AQTAÝ. QazAqparat - Aqtaýda Nurlan Noǵaevtyń tóraǵalyǵymen sybaılas jemqorlyqqa qarsy kúres jónindegi komıssııanyń otyrysy ótti. Jıynda Mańǵystaý oblysynyń jer resýrstaryn basqarý departamentiniń teńiz jaǵalaýynda ornalasqan 21 jer telimin qaıtarý úshin sotqa aryz bergeni belgili boldy, dep habarlaıdy QazAqparat Mańǵystaý oblysy ákiminiń baspasóz qyzmetine silteme jasap.

Sybaılas jemqorlyqqa qarsy is-qımyl agenttiginiń Mańǵystaý oblysy boıynsha departamenti basshysynyń birinshi orynbasary Birjan Haırýllınniń aıtýynsha, týrızmdi damytýǵa arnalǵan 21 jer teliminiń negizsiz berilgeni anyqtalǵan.

Mańǵystaý oblysynyń jer resýrstaryn basqarý departamenti jalpy kólemi 43 gektar jer telimin memleket menshigine qaıtarý týraly sotqa talap aryzben júgindi.

Aımaq basshysy Nurlan Noǵaev jer telimderin berýde ashyqtyqty saqtaýdy tapsyrdy.

– Jergilikti atqarýshy organdar ókilderiniń jer telimderin berý boıynsha negizsiz qabyldaǵan sheshimderi óńirdegi kásipkerlik pen týrızmniń damýyna keri áserin tıgizip otyr. Memleket basshysy Qasym-Jomart Toqaevtyń tapsyrmasyna sáıkes, bizge óńirdiń ekonomıkalyq jáne áleýmettik ahýalyn arttyryp, orta jáne shaǵyn bıznesti damytýǵa teń jaǵdaı jasaý qajet. Jerdi berýde shekten shyǵýǵa jol bermeý kerek, – dedi Nurlan Noǵaev.