Mańǵystaý ákimdigi men «Qazaqtelekom» tsıfrlandyrý salasyndaǵy «Jol kartasyna» qol qoıdy
Qol qoıylǵan qujattyń negizgi baǵyttarynyń biri aýyldyq aımaqtarda ınternet jelisiniń jyldamdyǵyn arttyrý arqyly el ekonomıkasynyń barlyq salasyn tsıfrlandyrý qyzmetteri servısteriniń biryńǵaı deńgeıin qamtamasyz etetin ınfokommýnıkatsııalyq ınfraqurylymdy jańǵyrtýǵa qatysý jáne seriktes bolý bolyp tabylady.
Búgingi kúnde oblystyń 61 aýylynyń 34-i talshyqty optıkaǵa qosylǵan. Jol kartasyna sáıkes 2018-2019 jyldar aralyǵynda 16 aýylǵa, onyń ishinde MJS jobasy boıynsha 6 aýylǵa talshyqty optıkalyq baılanys jelisin (TOBJ) salý josparlanyp otyr. Sonymen birge osy aýyldyq eldi mekenderde LTE 800 tehnologııasy boıynsha 4G jańa býynynyń symsyz qatynaý jelisin salý josparlandy. Talshyqty-optıkalyq jelini keńeıtý barlyq aýyl turǵyndaryn tsıfrlyq qyzmettermen, KJQ jáne utqyr baılanyspen qamtamasyz etýge múmkindik beredi, sondaı-aq memlekettik mekemelerdi biryńǵaı korporatıvtik jelige biriktirip, «Tsıfrly Qazaqstan» memlekettik baǵdarlamasynyń maqsatty kórsetkishterin oryndaýǵa múmkindik beredi.
Mańǵystaý oblysynyń ákimi Eraly Toǵjanov: «Birlesken is-sharalarmen sheshiletin ózekti mindetterdiń biri oblystyń barlyq bilim berý jáne densaýlyq saqtaý nysandarynyń ınternet jelisine joǵary jyldamdyqta qatynaýyn qamtamasyz etý bolyp tabylady. Búgingi kúnde mektepterdiń tek 55% men medıtsınalyq mekemelerdiń 8% ǵana 10 Mbıt/s astam jyldamdyqpen jumys isteıtin joǵary jyldamdyqtaǵy ınternetti paıdalanady. 2018 jyldyń sońyna deıin Mańǵystaý oblysynyń barlyq 134 mektebi men 111 medıtsınalyq mekemesin joǵary jyldamdyqty ınternetpen qamtamasyz etý josparlanýda. Bul óz kezeginde bilim berý jáne densaýlyq saqtaý salasynda tsıfrlandyrý jobalaryn júzege asyrýdy jedeldetýge múmkindik beredi»- dedi.
Sonymen qatar Mańǵystaýda «Smart Sity» pılottyq jobasy júzege asyrylady. Bul baǵytta «Qazaqtelekom» AQ aǵymdaǵy jyly Aqtaý qalasy men Jańaózen qalasynda 250 úıge 1650 beınekamera ornatyp, kóp qabatty turǵyn úı sektorynyń 62 myńnan astam turǵynyn «Bultty beınebaqylaý» qyzmetine qatynaýyn qamtamasyz etedi.
«Qazaqtelekom» AQ Basqarma tóraǵasy Qýanyshbek Esekeev: «Búgingi kúnde óńirde júzege asyrylatyn mańyzdy jobalardyń biri - Beıneý jáne Qaraqııaq aýdandaryn tsıfrly qyzmettermen qamtamasyz etetin «Tsıfrly aýdandar» jobasy bolyp tabylady. Bizdiń tarapymyzdan bul jobany júzege asyrý úshin ınternet jelisine keńjolaqty qatynaý qyzmetteriniń deńgeıin 100 úıge shaqqanda respýblıkalyq ortasha deńgeı 29%-dan 60%-ǵa deıin qamtamasyz etýge kúsh salýǵa baǵyttalatyn bolady»- dedi.
