Mango negizin qalaýshynyń uly ákesin óltirdi degen kúdikpen ustaldy
ASTANA. KAZINFORM — Katalonııa polıtsııasy ıspanııalyq Mango sán ımperııasynyń negizin qalaýshy Isak Andıktiń uly Djonatan Andıkti ákesin óltirdi degen kúdikpen ustady, dep habarlaıdy Kazinform agenttiginiń Eýropadaǵy menshikti tilshisi.
Mango dırektorlar keńesi tóraǵasynyń orynbasary, 45 jastaǵy Djonatan Andık seısenbi kúni tańerteń Barselonadaǵy úıinde qamaýǵa alynǵan. Keıin ol jaýap alý úshin Barselona mańyndaǵy Martorell qalasynyń tergeý sotyna jetkizildi.
Ispanııadaǵy eń baı adamdardyń biri bolǵan Isak Andık 2024 jylǵy 14 jeltoqsanda 71 jasynda qaza tapqan. Ol Montserrat taýlarynda jaıaý serýendep júrgen kezde shamamen 100 metrlik jartastan qulap ketkeni belgili. Oqıǵa kezinde Djonatan Andık jalǵyz kýáger bolǵan.
Bastapqyda ólim jazataıym oqıǵa retinde tirkelip, is 2025 jyldyń basynda jabylǵan edi. Alaıda 2025 jyldyń qazan aıynda ulynyń bergen jaýabyndaǵy sáıkessizdikter anyqtalǵannan keıin tergeý qaıta bastaldy. Polıtsııa Djonatannyń uıaly telefonyn tárkilep, teksergen, sondaı-aq basqa da dálelderdi zerttegen.
Soǵan qaramastan Djonatan Andık basynan beri ákesiniń ólimine qatysy baryn joqqa shyǵaryp, muny qaıǵyly jazataıym oqıǵa dep atap keledi. Andıkter otbasy da onyń kinásiz ekenin málimdep, tergeýmen yntymaqtasýǵa daıyn ekenin jetkizdi.
Túrkııada dúnıege kelgen Isak Andık Mango kompanııasyn 1984 jyly Katalonııada qurǵan. Qazirgi tańda jeliniń álem boıynsha shamamen 2900 dúkeni bar. 2024 qarjy jylynyń qorytyndysy boıynsha kompanııa satylymy rekordtyq kórsetkish — 3,3 mlrd eýrodan asqan. Forbes nusqasy boıynsha Isak Andık Ispanııanyń eń baı bes adamynyń qataryna engen.
Budan buryn Valentino sán úıiniń negizin qalaǵan Valentıno Garavanı ómirden ótkenin jazǵan bolatynbyz.
