Máńgilik dostyq pen strategııalyq seriktestik: Qazaqstan men Túrkııa kelissózderi
ASTANA. KAZINFORM – Qasym-Jomart Toqaev pen Rejep Taııp Erdoǵan Qazaqstan – Túrkııa Joǵary deńgeıdegi strategııalyq yntymaqtastyq keńesiniń altynshy otyrysyn ótkizdi. Bul týraly Aqorda málim etti.
Memleket basshysy Túrkııa Qazaqstan úshin baýyrlas el, mańyzdy ári senimdi seriktes sanalatynyn atap ótip, tamyry tereń baılanystar qos halyqtyń myzǵymas dostyǵyn odan ári nyǵaıtýǵa yqpal etip otyrǵanyn aıtty.
— Qazirgi tańda qazaq-túrik ekijaqty qarym-qatynasy keńeıtilgen strategııalyq seriktestik rýhynda qarqyndy damyp jatyr. Elderimizdiń arasynda eshqandaı túıtkil joq. Memleketaralyq jáne úkimetaralyq baılanystarymyz nyǵaıyp keledi. Parlamentaralyq yqpaldastyǵymyz da joǵary deńgeıde. Túrik delegatsııasynyń quramynda bir top depýtattyń jáne partııa músheleriniń bolýy — sonyń aıqyn dáleli. Sonymen qatar eki eldiń ekonomıkalyq yntymaqtastyǵy kúsheıe tústi. Túrkııa iri ınvestorlarymyzdyń qataryna kiredi. Osy ýaqytqa deıin Sizdiń elińizden ekonomıkamyzǵa 6 mıllıard dollar ınvestıtsııa tartyldy. Qazaqstannyń Túrkııaǵa salǵan ınvestıtsııasy da ósip, 2,5 mıllıard dollarǵa jýyqtady. Sondaı-aq Túrik eli — negizgi bes saýda seriktesimizdiń biri. Qos halyqtyń mádenı-gýmanıtarlyq baılanystary qarym-qatynasymyzdyń altyn arqaýy sanalady. Biz osy ıgi úrdisti saqtap, ózara yqpaldastyǵymyzdyń aıasyn keńeıte berýge múddelimiz. Búgin «Máńgilik dostyq jáne keńeıtilgen strategııalyq seriktestik týraly» deklaratsııany qabyldaımyz. Osy mańyzdy qujat qazaq-túrik qatynastaryn damytýǵa tyń serpin beretini anyq. Bul másele boıynsha eki eldiń de nıet-tilegi — bir, sondyqtan áleýetimiz de, múmkindigimiz de mol dep aıtýǵa tolyq negiz bar, — dedi Qasym-Jomart Toqaev.
Qazaqstan Prezıdenti búginde Túrkııa áleýmettik-ekonomıkalyq damýdyń jańa kezeńine qadam basyp, túrli salada eleýli tabysqa qol jetkizgenine nazar aýdardy.
— Sizdiń salıqaly, sarabdal saıasatyńyzdyń nátıjesinde Túrkııanyń álemdegi yqpaly men bedeli arta tústi. Túrik eli qýatty ekonomıka men salmaqty dıplomatııanyń arqasynda Eýropa men Azııany, kúlli túrki dúnıesin jalǵaǵan altyn kópir retinde tanylyp otyr. Memleketińizdiń jetistikteri — Sizdiń ult múddesin qorǵaý jolyndaǵy qajyrly eńbegińizdiń jemisi dep bilemiz, — dedi Prezıdent.
Taraptar saýda-ekonomıkalyq yqpaldastyqty tereńdetý máselesin talqylady.
Ótken jyldyń qorytyndysy boıynsha taýar aınalymy 8,8 paıyzǵa ósip, 5,4 mıllıard dollardan asqan.
Qasym-Jomart Toqaev saýda-sattyqty ári qaraı jandandyrýǵa qolaıly jaǵdaı jasap, alys-beristi ártaraptandyrýdyń mańyzyna toqtaldy.
Prezıdenttiń aıtýynsha, Qazaqstan Túrkııaǵa qazirdiń ózinde 34 taýar túri boıynsha eksport kólemin ulǵaıta alady. Onyń jalpy quny — 630 mıllıon dollardan asady.
Bul rette Memleket basshysy eki eldiń qarjy ortalyqtary men tsıfrlyq saýda platformalary arasyndaǵy seriktestiktiń, sondaı-aq búgin Astanada ótip jatqan Qazaq-túrik bıznes-forýmynyń nátıjesi saýda-ekonomıkalyq baılanystardy odan ári tereńdete túsetinine senim bildirdi.
Eske sala keteıik, buǵan deıin Memleket basshysy Túrkııa Prezıdentimen shaǵyn quramda kelissóz júrgizdi.
