Mańǵystaýlyqtardyń 133 mıllıon teńgesin ıemdengen alaıaqtar qolǵa tústi

AQTAÝ. KAZINFORM – Ústimizdegi jyldyń qazan aıynda Mańǵystaý oblystyq Polıtsııa departamentiniń tergeý basqarmasyna jergilikti turǵyndar ınternet-alaıaqtyqqa qatysty  shaǵym túsirgen.

Belgili bolǵandaı, alaıaqtar jábirlenýshilerdiń uıaly telefonyna qońyraý shalyp, ózderin QR Ulttyq qaýipsizdik komıteti jáne ulttyq bank qyzmetkerleri retinde tanystyryp, olardyń senimine kirý arqyly 133 354 450 tg kóleminde qarajatyn alaıaqtyq jolmen ıemdengen.

Mańǵystaý oblystyq Polıtsııa departamenti krımınaldyq polıtsııa basqarmasy bastyǵynyń orynbasary Erlan Nysanovtyń málimetinshe, polıtsııa qyzmetkerleri oblys prokýratýrasynyń úılestirýimen jedel-izdestirý sharalaryn júrgizip, jábirlenýshilerdiń qarajaty 20-dan astam droperdiń esepshottaryna aýdarylǵanyn anyqtaǵan. Droperlerdiń basym bóligi Almaty qalasyndaǵy joǵary oqý oryndarynyń stýdentteri ekeni anyqtalyp, issapar uıymdastyrylǵan. Nátıjesinde joǵaryda atalǵan droperler qarajatty 26 jáne 21 jastaǵy tulǵalarǵa aýdarǵan bolyp shyqty. Kúdikteler ustalyp, ýaqytsha ustaý ızolıatoryna qamaýǵa alyndy.

Qazirgi tańda qylmystyq is boıynsha tergeý amaldary júrgizilip jatyr. Mańǵystaý oblystyq Polıtsııa departamenti turǵyndardy alaıaqtyq is-áreketterden asa saq bolýǵa shaqyrdy.

Buǵan deıin, Óskemende turǵynda aldap, 10 mıllıon teńge nesıe alǵyzǵan alaıaqtyń ustalǵany týraly jazǵan bolatynbyz.