Mańǵystaýlyqtar ushaq apatynan zardap shekken sońǵy naýqastardy eline shyǵaryp saldy
AQTAÝ. KAZINFORM - Búgin, 30 jeltoqsan kúni Mańǵystaý oblysynyń basshylary, dárigerler men qutqarýshylar ushaq apatynan zardap shegip, jansaqtaý bóliminde 6 kún emdelgen úsh ázirbaıjandyq azamatty arnaıy bortpen eline shyǵaryp saldy.
Mańǵystaý oblysy ákiminiń baspasóz qyzmetiniń habarlaýynsha, 25 jeltoqsannan beri oblystyq kópbeıindi emhanasynyń jansaqtaý bóliminde jatqan Leıla Omarova, Mýslımat Sıradjova men Hafızat Halaevany búgin Ázirbaıjannan arnaıy kelgen ushaqtarmen eline alyp ketti. Úsheýiniń de jaǵdaıy nasharlaǵan joq, 1 naýqas mehanıkalyq ventılıatsııadan, vazopressordan jáne dárilik sedatsııadan shyǵaryldy. Al ekeýinde vazopressorlardyń dozasy mınımaldy dozalarǵa deıin tómendetilgen. Dárigerler olardyń ómirin saqtap qalý úshin baryn saldy.
«Búginde Mańǵystaý oblystyq kópbeıindi emhanasynda ushaq apatynan zardap shekken naýqastar joq. Mańǵystaýlyq dárigerler áýe apatynan jaraqat alǵan 29 azamattyń túgel aman-esen eline jetkenine dán rıza», - delingen habarlamada.
Eske salaıyq, 25 jeltoqsanda Aqtaý mańynda Azerbaijan Airlines ushaǵy apatqa ushyrady.
Ushaq bortynda 67 adam, onyń ishinde bes ekıpaj múshesi bolǵan. Oqıǵa saldarynan 38 jolaýshy qaza tapty. Ókinishke qaraı, mert bolǵan jandardyń arasynda 6 Qazaqstan azamaty bar.
Memleket basshysy Qasym-Jomart Toqaev Ázerbaıjan Prezıdenti Ilham Álıevke kóńil aıtty.
Osyǵan deıin Mańǵystaý oblystyq kópbeıindi aýrýhanasynda 6 patsıent, onyń tórteýi reanımatsııa bólimshesinde, ekeýi travmatologııada emdelip jatqanyn habarladyq.