Mańǵystaýlyqtar Qyrǵyz eliniń azamattaryn eline shyǵaryp saldy
AQTAÝ. KAZINFORM – Aqtaý mańyndaǵy ushaq apatynan zardap shekken qyrǵyzstandyq úsh azamat eline barady.
Mańǵystaý oblysy ákimi baspasóz qyzmetiniń málimetinshe, búgin, 29 jeltoqsan kúni Aqtaý mańyndaǵy ushaq apatynan zardap shekken qyrǵyzstandyq úsh azamat –Tılek Osmonov, Erlan Djýnýshýalıev jáne kúni keshe jansaqtaý bóliminen shyqqan Rınat Asanov Aqtaýǵa kelgen jaqyn týystarymen birge óz elderine jol tartty.
Olarǵa Mańǵystaý oblystyq aýrýhanasynda tıisti medıtsınalyq kómek kórsetildi. Búginde úsh azamattyń da jaǵdaıy turaqty. Zardap shekkenderdi áýejaıdan shyǵaryp salýǵa Mańǵystaý oblysy ákiminiń orynbasary Abbat Órisbaev qatysty.
Qazirgi ýaqytta Mańǵystaý oblystyq kópbeıindi aýrýhanasynyń jansaqtaý bóliminde ushaq apatynan zardap shekken úsh ázerbaıjandyq azamat em qabyldap jatyr.
Aıta keteıik, apat sebebin anyqtaý maqsatynda Aqtaýda Úkimettik komıssııa jumysyn jalǵastyryp jatyr.
Eske sala keteıik, 25 jeltoqsanda Aqtaý mańynda Azerbaijan Airlines ushaǵy apatqa ushyrady.
Ushaq bortynda 67 adam, onyń ishinde bes ekıpaj múshesi bolǵan. Oqıǵa saldarynan 38 jolaýshy qaza tapty. Ókinishke qaraı, mert bolǵan jandardyń arasynda 6 Qazaqstan azamaty bar.