Mańǵystaýlyq turǵyn jalǵyzilikti anany baǵyp, eldi súısintti
AQTAÝ. KAZINFORM — Jańaózen qalasynyń turǵyny Nursultan Myńjas kópke úlgi bolarlyq qaıyrymdy is jasap otyr. Ol Túrikmenstanda jalǵyz qalǵan keıýanany ekinshi anasyndaı qabyldap, qamqorlyǵyna alǵan. Ony óz otbasymen birge Qazaqstanǵa kóshirip ákelip, zeınetaqy alýǵa kómektesken.
— Meni tastama degesin, ózimizdiń qazaǵymyz bolǵasyn Qazaqstanǵa ózimizmen birge kóshirip alyp keldik. Ózimniń anam sııaqty kóremin. Qasymyzda, bala-shaǵamnyń ortasynda turyp jatyr. Anam ekeýi tatý-tátti, bárin aqyldasyp sheshedi, — deıdi Nursultan.
Alpysty alqymdaǵan Aısulý Juparova da Nursultandy týǵan balasyndaı jaqsy kóredi. Taǵdyrdyń talaı qıynshylyǵyn kórgen áıel Túrkimenstanda týyp-ósip, turmysta bolmaǵan. 30 jyl medbıke bolyp eńbek etken. Kórshiniń balasy Nursultandy «bala qylyp» baýyryna basqan.
— Qazaqtyń jerine baraıyn, sen barsyń ǵoı maǵan basqa eshteńe kerek emes dedim. Nursultanym bolsa boldy maǵan. Aýyrǵan kezimde kómektesti. Ne surasam da ákelip beredi. Endi ne kerek maǵan? Maǵan Nursultanym, bala-shaǵasymen birge aman bolsa boldy, — deıdi Aısulý Juparova.
Nursultan Myńjas otbasymen 2021-jyly Túrkimenstannan Qazaqstanǵa qonys aýdarǵan. 32 jastaǵy azamattyń ata-anasy, jubaıy men 3 balasy bar.
Buǵan deıin, sheteldik ınvestor Bozjyra shatqalyna qonaqúı salýǵa qyzyǵýshylyq tanytqany týraly jazǵan bolatynbyz.