Mańǵystaýlyq turǵyn 4 mln teńge alıment qaryzyn ótep, jazadan qutyldy

AQTAÝ. KAZINFORM – Mańǵystaý oblysynyń kámeletke tolmaǵandardyń isteri jónindegi mamandandyrylǵan aýdanaralyq sotynda balasyna alıment tóleý boıynsha mindetti oryndamaǵan turǵynǵa qatysty qylmystyq is qaraldy. 

2018 jyly sottalýshyǵa qatysty 2016 jyly týǵan qyzyn asyraý úshin ol kámelettik jasqa jetkenshe barlyq tabysynyń tórtten bir bóligi mólsherinde alıment óndirý týraly sot buıryǵy shyǵarylyp, sottalýshyǵa alıment tólemegen jaǵdaıda qylmystyq jaýapkershilikke tartylatyndyǵy eskertilgen.

Sottalýshy jeke sot oryndaýshyǵa óziniń jumys taba almaǵanyn, biraq beıresmı túrde jaldamaly jumysty oryndaǵanyn, sol arqyly tabysyn jasyrǵanyn habarlaǵan.

Sot aktisin oryndaý boıynsha jeke sot oryndaýshy onyń banktik shotyna tyıym salý jáne kólik quraldaryn basqarýǵa shekteý qoıý sııaqty májbúrleý sharalaryn qoldanǵan.

Boryshkerdiń 2016 jyldan 2024 jyldyń maýsym aıyna deıingi alımenttik qaryzy 4 mıllıon teńgeden asqan.

Sot qabyldaǵan sharalardyń nátıjesinde sottalýshy burynǵy áıelimen tatýlasqan jáne barlyq alıment boıynsha bereshegin ótegen.

Prokýror, jábirlenýshi jáne sottalýshynyń ózi ókinip, sottan tatýlasýǵa jáne alıment boıynsha bereshekti óteýge baılanysty qylmystyq isti qysqartyp, qylmystyq jaýaptylyqtan bosatýdy surady.

Qylmystyq kodekstiń 139-babynyń sanktsııasynda jaza 600 saǵatqa deıin qoǵamdyq jumysqa tartý nemese 2 jylǵa deıin bas bostandyǵyn shekteý, ne sol merzimge bas bostandyǵynan aıyrý qarastyrylǵan.

Sottalýshynyń kinási onyń moıyndaýymen, jábirlenýshiniń, jeke sot oryndaýshynyń aıǵaqtarymen jáne qylmystyq is materıaldarymen dáleldengen.

Sondyqtan sot Qylmystyq Kodekstiń 68-babynyń 1-bóligine sáıkes taraptardyń tatýlasýyna jáne qaryzdy óteýge baılanysty sot qylmystyq isti qysqartyp, sottalýshyny qylmystyq jaýaptylyqtan bosatty.

Sot qaýlysy zańdy kúshine engen joq.

Buǵan deıin Mańǵystaýda júkti áıelin pyshaqtaǵan turǵynnyń 15 jylǵa sottalǵanyn jazǵan bolatynbyz.