Mańǵystaýlyq sportshylar Parıjdegi jazǵy Olımpıadaǵa lıtsenzııa ala almaǵan
AQTAÝ. KAZINFORM – Parıj Olımpıadasyna mańǵystaýlyq sportshylardyń joldama almaýynyń óz sebebi bar. Ol týraly Mańǵystaý oblystyq Dene shynyqtyrý jáne sport basqarmasynyń basshysy Maqsat Muqash málimdedi.
«Tórt jylda bir ótetin mańyzdy dodaǵa lıtsenzııa ala almaýymyzdyń basty sebebi – oblysta daryndy balalarǵa arnalǵan sporttyq mektep – ınternat- kolledji, sportshylardy ońaltý ortalyqtarynyń joqtyǵy jáne aýdan, qalalarda balalar men jasóspirimder sport mektepteriniń jetispeýshiligi. Oǵan dálel taǵy bir kórsetkish – lıtsenzııa almaǵan oblystarda ǵana sporttaǵy daryndy balalarǵa arnalǵan mektep ınternaty joq. Bul kóńil aýdararlyq másele. Aldaǵy ýaqytta bul mekemelerdi ashý qolǵa alynsa, mańǵystaýlyq sportshylardyń olımpıadalyq rezervi artyp, olardyń arasynda Olımp shyńyn baǵyndyratyn myqtylar shyǵady dep úmittenemiz», - dedi Maqsat Muqash.
Aımaqta olımpıadalyq rezervtiń oblystyq mamandandyrylǵan mektep-ınternat-kolledji ashylǵan jaǵdaıda grek-rım kúresi, erkin kúres, dzıýdo, boks,taekvondo sııaqty olımpıadalyq basym sport túrlerin kirgizip, sport rezervin damytý josparda. Sonymen qatar, óńirge dárigerlik-dene shynyqtyrý dıspanserin ashý boıynsha úzdik tájirıbeni eńgizý qajet.
Qazir óńirde 31 memlekettik sport mekemesi jumys isteıdi. Balalar men jasóspirimder sport mektebinde 2 myńǵa jýyq bala men jastar shuǵyldanady, bul óńir oqýshylarynyń 11%-y. Sondaı-aq, 80 jeke kásipker 24 sport túrinen 9076 bala men jasóspirimdi sportpen qamtamasyz etip otyr.
«Qazaqstan Respýblıkasy VI jazǵy spartakıadasynyń qorytyndysy boıynsha oblystyń qurama komandasy 20 óńirdiń ishinde jalpy komandalyq esepte 18-orynǵa ıe bolsa, HІH Jazǵy Azııa oıyndarynda 19 orynda turaqtady. Al Astana qalasynda 8-14 qyrkúıekte ótetin dúnıejúzilik kóshpendiler oıyndaryna Mańǵystaýlyq sportshylarǵa nebári 4 joldama berildi», - deıdi basqarma basshysy.
