Mańǵystaýlyq sarbazdyń anasynyń shaǵymyna qatysty qylmystyq is qozǵaldy

AQTAÝ. KAZINFORM — Qorǵanys mınıstrligine qarasty Qurlyq áskerleriniń Bas qolbasshysy basqarmasy mańǵystaýlyq áskerı qyzmetshiniń anasynyń málimdemesine jaýap berdi.

Sarbazdyń anasy ulynyń áskerı bólimde álimjettikke ushyraǵanyn, sonyń saldarynan psıhıatrııalyq klınıkaǵa jatqyzylǵanyna shaǵymdanǵan bolatyn.

Vedomstvonyń málimetinshe, áskerı qyzmetshiniń anasynyń vıdeoúndeýi boıynsha Іshki ister mınıstrliginiń Batys óńirlik áskerı-tergeý basqarmasy qylmystyq is qozǵaǵan. Sondaı-aq, «Batys» óńirlik qolbasshylyǵy áskerleri qolbasshysy basqarmasynyń ofıtserlerinen jumys toby qurylyp, qyzmettik tekseris taǵaıyndaldy.

Qurlyq áskerleri ananyń áskerı qyzmetshiniń ústinen fızıkalyq jáne seksýaldyq zorlyq-zombylyq jasaldy degen málimdemelerin teksergenin atap ótti.

— Kýágerlerdiń túsiniktemeleri boıynsha, áskerı qyzmetshige qatysty fızıkalyq nemese seksýaldyq zorlyq-zombylyq kórsetilgenin dáleldeıtin derekter anyqtalǵan joq. Oǵan qatysty soqqyǵa jyǵý nemese seksýaldyq sıpattaǵy zorlyq faktilerin rastaıtyn adamdar tabylǵan joq. Baqylaý kameralarynyń barlyǵy tergeý organdarynyń qyzmetkerleri tarapynan qaralyp shyqty, áskerı tártip buzýshylyqtar nemese quqyqbuzýshylyq faktileri tirkelgen joq, — delingen habarlamada. 

Sondaı-aq, Qurlyq áskerleri áskerı qyzmetshiniń ózi bergen túsiniktemeleriniń birneshe ret ózgergenin, al ol keltirgen ýájderdiń bir-birine qaıshy kelip, túrli nusqalar usynǵanyn aıtty.

Buǵan deıin, Mańǵystaýda ózine jaraqat salǵan sarbaz psıhıkalyq densaýlyq ortalyǵyna jatqyzylǵany týraly jazǵan bolatynbyz.

Sodan soń, Qarýly Kúshter mańǵystaýlyq sarbazǵa qatysty túsinikteme berdi.