Mańǵystaýlyq pedagog oqýshyǵa bolashaq mamandyǵyn tańdaýǵa kómektesetin bot ázirledi

ASTANA. KAZINFORM — Mańǵystaý oblysy Túpqaraǵan aýdany Aqshuqyr mektep-lıtseıinde pedagog- kásibı baǵdar berýshi bolyp qyzmet atqaratyn Nazerke Jantańatova «PROF-Guide» jobasyn jasap shyǵardy. Bul týraly Oqý-aǵartý mınıstrligi málim etti. 

Joba oqýshylarǵa mamandyq tańdaý boıynsha naqty jáne júıelengen aqparat usynyp, ata-ana — maman — oqýshy arasyndaǵy baılanysty nyǵaıtýdy kózdeıdi.

Onda kásibı baǵdarlaý boıynsha testter jıyntyǵy, mamandyq tańdaýǵa arnalǵan keńester, beıindik pánderge sáıkes mamandyqtar, Qazaqstandaǵy JOO jáne kolledjder, jańa mamandyqtar týraly naqty aqparattar toptastyrylǵan.

– Sońǵy ýaqytta oqýshylardyń «Qaı mamandyqty tańdasam bolady?», «Granttar týraly aqparatty qaıdan tapsam bolady?» degen suraqtardy jıi qoıyp júrgenin baıqadym. Mundaı saýaldar kóbeıgen saıyn kásibı baǵdar berý jumysyn jeńil ári qoljetimdi etý qajettiligi artty. Sol sebepti oqýshylarǵa naqty baǵyt beretin «PROF-Guide» atty Telegram botyn jasadym, — deıdi Nazerke Jantańatova.

Bul tek avtomatty júıe emes. Oqýshylar men ata-analar óz suraqtaryn bot arqyly joldap, joba avtorynan óz suraqtaryna jaýap ala alady.

Aıta keteıik, buǵan deıin Ertis boıynda 10 til biletin oqýshy turatynyn jazdyq.