Mańǵystaýlyq parasportshylar Qazaqstan kýbogyna óz qarajatymen barýǵa májbúr bolǵan

AQTAÝ. KAZINFORM — Mańǵystaý oblysynyń parasportshylary men olardyń ata-analary Astana qalasynda ótip jatqan Qazaqstan kýbogy boıynsha bochcha jarysyna óz qarajattarymen barǵan. Sebebi, oblystyq sport basqarmasy tarapynan qarjy bólinbegen.

Ata-analardyń aıtýynsha, parasportshylar birneshe aı boıy daıyndalǵan, biraq jarysqa sanaýly kúnder qalǵanda basqarmadan qarjy bólinbeıtini týraly habar kelgen. 

— Balalar tamyz aıynan bastap daıyndaldy. Sondyqtan óz qarajatymyzǵa bılet alýǵa týra keldi. 240 myń teńgege bılet satyp aldyq. Keıbiri tipti sol úshin nesıe aldy. Qonaqúıdi de ózimiz tólep jatyrmyz. Balalardy jerge qarata almadyq. Bıliktegiler múmkindigi shekteýli balalardan únemdeýdi jón kórgen sııaqty. Kómek beremiz dep, sózinde turmady. Qarjy bólinetini týraly naqty jaýap áli joq. Bizdi jaı ǵana kómeksiz qaldyrdy. Keıbir ata-analar qarjylaı qıyndyqqa baılanysty sapardan bas tartýǵa májbúr boldy, — deıdi ata-analar.

Mańǵystaý oblystyq sport jáne dene shynyqtyrý basqarmasy basshysynyń orynbasary Qanat Mańǵybaevtyń aıtýynsha, qarjynyń bólindeýine — esepshottardyń jabylýy sebep bolǵan.

— Bizdiń qaramaǵymyzda 37 mekeme bar, qazirgi ýaqytta «úzilis» kezeńi júrip jatyr. Osy ýaqytta esepshottar tolyq jabylady, biz eshteńe jasaı almaımyz. Praktıkada tólemder keshigip jatady, al keıde kerisinshe, buryn jasalady. Barlyǵy jattyqtyrýshynyń ótinishin qashan bergenine baılanysty. Eger jattyqtyrýshy oqıǵadan 10 kún buryn ótinish berse, biraq esepshot jabyq bolsa, biz eshteńe túzete almaımyz. Sondaı-aq, aıdyń sońy bolsa da eshteńe isteı almaımyz, — deıdi Qanat Mańǵybaev. 

Qanat Mańǵybaev balalardyń Qazaqstan kýbogyna qatysýy týraly jattyqtyrýshynyń ótinishine basqarma basshysy qol qoıyp, buıryq shyqqanyn jetkizdi. 

— Qazynashylyq esepshottardy ashqan boıda qarjy parasportshylardyń ata-analaryna aýdarylady, — dedi ol. 

Buǵan deıin, Astanada bochchadan alǵash ret halyqaralyq jarys ótken bolatyn