Mańǵystaýlyq paralımpıadashylar kóshede jáne jer úıdiń aýlasynda jattyǵýǵa májbúr
AQTAÝ. KAZINFORM — Jańaózen qalasynda paralımpıada sportshylary atpen kóshede jattyǵýǵa májbúr. Sebebi at sportyna jabdyqtalǵan arnaıy oryn joq.
Jańaózen qalasynyń turǵyny Samat Álen múmkindigi shekteýli balalardy 2018 jyldan beri at sportyna baýlyp keledi. Nátıjesinde 20 shaqty sportshy shyqqan.
Olar jyl saıyn shetelde ótetin jarysta júldeli oryndardy ıelenip júr.
Keshe ǵana Qazaqstan chempıonatynan 1 altyn, 1 kúmis medal alǵan. Al, Qazaqstan kýbogynda 5 altyn 4 kúmis medal enshilep, Mańǵystaýdyń abyroıyn asqaqtatqan.
— Osy kezge deıin 20 shaqty paralımpıada sportshysyn tárbıelep shyǵardyq. Endi onyń ishinde aýyryp qalǵandary da bar. Sebebi jabyq manejdiń joqtyǵynan sýyq kúnderi dalada jattyǵýǵa týra keledi. Balalardyń densaýlyǵy onsyz da nashar. Kóp sportshymyz shyǵyp ketip jatyr. Halyqaralyq jarystar kóbine qys mezgilinde bolady. Sondyqtan bizdiń sportshylar qaqaǵan qysta ashyq aspan astynda daıyndalady, — deıdi Samat Álen.
Jattyqtyrýshy jabyq manejdiń tek Mańǵystaýda ǵana joq ekenin aıtady. Paralımpıada sportshylary qazir Jańaózen qalasynyń turǵyny, qaıyrymdy jan Marat Іdiristiń jylqylarymen sonyń aýlasynda jattyǵyp júr.
Ákimdik Jańaózen qalasynan 20 shaqyrym jerdegi ıppodromnyń ashyq alańyn usynǵan. Alaıda oǵan múmkindigi shekteýli sportshylar qatynaı almaımyz deıdi. Paralımpıadashylarǵa qalanyń mańynan jabyq oryn qajet.
Máselege Jańaózen qalasynyń ákimi Janseıit Qaınarbaı pikir bildirdi. Sheneýniktiń aıtýynsha, qalanyń ishinen jabyq manej salý sanıtarlyq talapqa saı kelmeıdi. Sondyqtan eldimekenderdiń shet jaǵynan jer berý máselesi qaralmaq.
— Ulttyq sportty qoldaýǵa ózimiz de daıynbyz, degenmen munyń barlyǵy qarjy máselesine kelip tirelip tur. Osy mańnan ýaqytsha jer berý boıynsha ótkende usynys bergen. Endi ony aldaǵy ýaqytta zańǵa sáıkes mindetti túrde qaraımyz, — deıdi qala ákimi Janseıit Qaınarbaı.
Buǵan deıin Aqtaýda 36 gektarǵa jýyq jer májbúrli túrde memleketke qaıtarylǵanyn jazǵan bolatynbyz.
