Mańǵystaýlyq oqýshylar aýa raıynyń qolaısyzdyǵyna baılanysty qashyqtan oqıdy

AQTAÝ. KAZINFORM — Oblystyq bilim basqarmasy aýa raıynyń qolaısyzdyǵyna baılanysty búgin, 6 qarashada aımaq oqýshylary onlaın rejıminde bilim alyp jatqanyn habarlady.

— Ózgerister tek mektep oqýshylaryna ǵana emes, stýdentterge de áser etti. Búgin, 6 qarashada aýa raıynyń qolaısyzdyǵyna baılanysty Aqtaý, Jańaózen, Beıneý, Qaraqııa, Mańǵystaý, Túpqaraǵan, Munaıly aýdandaryndaǵy birinshi aýysymdaǵy sabaqtar qashyqtyqtan oqytýǵa aýystyryldy. Sondaı-aq, barlyq kolledjderdegi sabaqtar onlaın ótýde. Ózgerister bolǵan jaǵdaıda qosymsha habarlanatyn bolady, — dep habarlady bilim basqarmasy.

Aıta keteıik, búgin óńirde daýyldy eskertý jarııalandy. Mańǵystaý oblysynyń soltústik-shyǵysynda kóktaıǵaq kútilýde. Jeldiń jyldamdyǵy sekýndyna 15-20 metrge deıin jetedi. Aqtaý qalasynda soltústik-batystan jel soǵyp, ekpini sekýndyna 15-20 metrge deıin, túnde sekýndyna 23 metrge deıin jetedi.

Buǵan deıin, daýyldy jelden elektr symdary ajyrap, Aqtaýdyń teń jartysy jaryqsyz qalǵanyn jazǵan bolatynbyz.