Aqtaýlyq oqýshy Qajymuqan balýan týraly komıks shyǵardy
AQTAÝ. KAZINFORM - 10-synypta oqıtyn Ramazan Súgirbaı kásipqoı balýan, alyp kúsh ıesi – Qajymuqan Muńaıtpasuly týraly málimetterdi sýretpen árlep, komıks kitap jasap shyǵardy.
Aqtaý qalasyndaǵy № 13 mektep-gımnazııasynda bilim alatyn oqýshy komıks arqyly aty ańyzǵa aınalǵan batyrlardyń beınesi men erligin jastarǵa jetkizgisi keledi. Komıks — ádebıet pen beıneleý óneri ushtasqan janr.
Ramazan: «kólemi óte úlken, derekteri, kóp aqparatty jastarǵa osyndaı formatta jetkizgen tıimdi", — deıdi.
— Komıkste oqıǵa jelisi sýret arqyly beınelenedi jáne óte qysqa mátin jazylady. Jalpy adamǵa tom-tom kitaptardy oqyp shyǵýǵa birneshe aı ýaqyt qajet. Al komıks arqyly qysqa ýaqytta qajetti ári mol málimetterdi bilýge bolady. Ýaqytty únemdeýge kómektesedi, — deıdi oqýshy.
Ramazanǵa komıks jasap shyǵarýdy ákesi usynǵan.
– Sýret salý — meniń hobbıim. Bir kúni ákem kishkentaı balalarǵa arnap komıks jasaýdy usyndy. Basynda «múmkin emes nárse» sııaqty bolyp kórindi. Sýret salýǵa ıkemim bolǵan soń, qazaq ertegileriniń biri «Kóltaýysardy» salyp kórdim. Sýretti bir emes, birneshe ret salǵanda keıipkerdiń beınesi shyǵa bastady. Keıin Qajymuqan Muńaıtpasulynyń osy komıksin qurastyryp shyqtym, — deıdi avtor.
Ramazanǵa ataqty balýan týraly komıks ázirleýge bir aı ýaqyt jetkilikti bolǵan.
- Komıks kitap qurastyrar aldynda Qajymuqan atamyz týraly oqyp, fılmin kórip shyqtym. Bul komıks arqyly balalardy sportqa, onyń ishinde kúreske shaqyrǵym keldi. Taǵy bir maqsatym — bizdiń 4-5 jastaǵy kishkentaı oqyrmandarymyz orasan kúshtiń ıesi, boz kilemde talaı balýandy jeńgen qazaqtyń batyry týraly bilse degen oı boldy, — deıdi Ramazan Súgirbaı.
Ramazan aldaǵy ýaqytty halyq ertegisi «Tolaǵaıdyń» komıks nusqasyn ázirlep, oqyrmandarǵa usynýdy josparlaıdy.
