Mańǵystaýlyq oqýshy Azııa-Tynyq muhıty aımaǵynyń eń úzdik lıngvısi atandy

ASTANA. KAZINFORM —  Azııa-Tynyq muhıty lıngvıstıkalyq olımpıadasy — APLO-2025 óz máresine jetti. Qytaı, Avstralııa, Gonkong, Japonııa, Malaızııa, Iran, Koreıa, Sıngapýr, Taıland sııaqty ATA elderiniń daryndy oqýshylaryn biriktirgen bedeldi zııatkerlik jarysqa bıyl 500-ge jýyq oqýshy qatysty. 

Oqý-aǵartý mınıstrliginiń málimetinshe, baıqaý qorytyndysy boıynsha Mańǵystaý oblysyndaǵy IT-lıtseıdiń oqýshysy Ramazan Býtantaev joǵary nátıje kórsetip, olımpıadanyń absolıýtti jeńimpazy atandy. Ol aımaqtyń eń myqty qatysýshylaryn basyp ozyp, altyn medal ıelendi.

Jalpy, Qazaqstan quramasy lıngvıstıkalyq olımpıada tarıhyndaǵy eń úzdik nátıjeni kórsetti — 5 medal jáne 3 quurmet gramotasyn jeńip aldy:

Ramazan Býtantaev — 10-synyp, mamandandyrylǵan IT-lıtseı, Mańǵystaý oblysy;

Samır Sarbasov — 12-synyp, NZM, Astana qalasy;

Tımýr Kantaev — 11-synyp, «Arystan» mamandandyrylǵan mektebi, Almaty qalasy;

Zere Serikova — 11-synyp, №9 «Zerde» mektebi, Astana qalasy;

Temirlan Seıtbattal — 11-synyp, BIL, Aqmola oblysy.

Qurmet gramotasymen marapattalǵandar:

Islam Sıpattalov — 10-synyp, BIL, Aqtóbe qalasy;

Shyńǵys Qarasaev — 11-synyp, NZM, Oral qalasy;

Aron Hasanov — 11-synyp, BIL, Atyraý qalasy.

Lıngvıstıkadan el qurama komandasynyń jattyqtyrýshysy — lıngvıstıka jáne geografııa pánderinen halyqaralyq jáne respýblıkalyq olımpıadalar jeńimpazy, Eberhard jáne Karl atyndaǵy Tıýbıngen ýnıversıtetiniń 2-kýrs stýdenti — Aıda Davletova.

Asia Pacific Linguistics Olympiad (APLO) — joǵary synyp oqýshylaryna arnalǵan halyqaralyq lıngvıstıkalyq olımpıada. Bul olımpıada logıkalyq oılaý, tildik túısigi men mádenıetaralyq quzyrettilikti damytýǵa baǵyttalǵan jáne Halyqaralyq lıngvıstıkalyq olımpıadaǵa (IOL) qatysýǵa jol ashady. APLO — oqýshylarǵa halyqaralyq deńgeıde ózderin synap kórýge jáne akademııalyq ortada tanyla túsýge úlken múmkindik beredi.

Aıta ketelik arystyq túlek 4 614 000 AQSh dollary kóleminde grant jeńip alǵan edi.