Mańǵystaýlyq munaıshylar óndiris oryndarynda óz tańdaýyn jasap jatyr
AQTAÝ. KAZINFORM — Búgin Mańǵystaý oblysynyń Qaraqııa aýdanynda eńbek adamdary saıası naýqanǵa belsendi qatysyp, óz azamattyq tańdaýlaryn óndiris oryndarynda jasady.
Aýdan aýmaǵyndaǵy munaı-gaz salasynda eńbek etetin jumysshylar úshin arnaıy jaǵdaılar jasalyp, olar óndiristik úderisten qol úzbeı-aq daýys berý múmkindigine ıe boldy.
Óńir ekonomıkasynyń negizgi tirekteriniń biri sanalatyn munaı salasynda qyzmet etetin jumysshylar tańǵy ýaqyttan bastap óz ýchaskelerinde daýys berip, el ómirindegi mańyzdy naýqannan tys qalmaıtynyn kórsetti. Kóptegen munaıshy aýysymaralyq ýaqytty paıdalanyp, azamattyq boryshyn oryndady.
Saılaý úderisiniń ashyq ári uıymdasqan túrde ótýi úshin óndiris oryndarynda barlyq qajetti shara qabyldandy. Ýchaskeler zań talaptaryna sáıkes jabdyqtalyp, saılaý komıssııalary men baqylaýshylar óz mindetterin talapqa saı atqaryp jatyr.
Munaıshylardyń aıtýynsha, el bolashaǵyna beıjaı qaramaı, mańyzdy qoǵamdyq-saıası naýqandarǵa qatysý — árbir azamattyń jaýapkershiligi. Sondyqtan olar óndiristegi qarbalasqa qaramastan daýys berýge ýaqyt taýyp, óz tańdaýlaryn jasap jatyr.
