Mańǵystaýlyq muǵalim erekshe balmuzdaqtyń daıyndalý ádisin jarııalady
ASTANA. KAZINFORM – Qazaqstandyq pedagog irimshikten elde joq balmuzdaq jasap shyǵardy. Ol osy jańa desert arqyly halyqaralyq baıqaýda jeńimpaz atanǵan.
Mańǵystaý oblysyndaǵy Týrızm kolledjiniń óndiristik oqý sheberi «Búgin LIVE» baǵdarlamasyna onlaın suhbat berip, avtorlyq taǵamyn tanystyrdy.
– 2024 jyly Taraz qalasynda ótetin halyqaralyq jarysqa daıyndalyp jatqanbyz. Jarysqa qatysýshylar alty elden ózderiniń ulttyq taǵamdaryn usyndy. Bizde sol kezde tek baýyrsaq boldy. Sol sátte desert retinde erekshe nárse usyný týraly ıdeıa týyndady. Osy maqsatpen sıyrdyń irimshigi men túıeniń tabıǵı sútinen daıyndalǵan balmuzdaq jasaýdy uıǵardym. Nátıjesi óte tamasha boldy. Men qasymdaǵy stýdentimdi osy retsept boıynsha daıyndap, úırettim de, jarysqa qatystyq, – deıdi Elaman Nuraı.
Tóreshiler de erekshe balmuzdaqty joǵary baǵalapty.
– Tóreshiler balmuzdaqtyń dámin tatqan soń qatty tań qaldy. Olar balmuzdaqty joǵary baǵalap, tipti onyń patentin alý qajettigin aıtty. Osy balmuzdaqtyń arqasynda biz jarysta birinshi orynǵa ıe boldyq, – deıdi maman.
Elaman Nuraı endi avtorlyq týyndysyn naryqta keńinen taratýdy kózdep otyr.
– Aldaǵy ýaqytta osy ónimdi naryqqa shyǵarýdy josparlap otyrmyn. Qazir tapsyrystar qabyldap jatyrmyn, alaıda ónimdi kóp mólsherde óndire alatyn kásipornym joq. Qazirgi tańda Aqtaý qalasynan kóptep tapsyrys alyp, ózim daıyndap jiberip jatyrmyn. Sonymen qatar, Atyraý men Aqtóbe qalalarynan da tapsyrystar kelip tústi. Bul qalalarǵa tájirıbe retinde daıyn ónimderdi jiberip kórdim, bári jaqsy boldy. Kásipti dóńgeletip, ári qaraı keńeıtý josparda bar, – deıdi pedagog.
Desert avtory jańa taǵamnyń daıyndalý ádisin túsindirdi.
– Balmuzdaqty sıyrdyń irimshigi, túıeniń súti jáne balqaımaqty aralastyra otyryp daıyndaımyn. 100 adamǵa jetetindeı mólsherdegi balmuzdaqty jasaýǵa shamamen 1 saǵat ýaqyt ketedi, – deıdi ol.
Aıta keteıik, TurkicSkills-2025 chempıonaty aıasynda ótken halyqaralyq «Caspian» festıvaliniń kórmesinde Mańǵystaý týrızm kolledjiniń óndiristik oqý sheberi Nuraı Elaman óz avtorlyq taǵamyn tanystyrdy.