Mańǵystaýlyq qutqarýshylar Atyraý oblysyna kómekke attandy
AQTAÝ. KAZINFORM — Atyraý oblysynda sý tasqyny jaǵdaıynyń kúrdelenýine baılanysty Mańǵystaý oblystyq tótenshe jaǵdaılar departamentiniń jedel toby 18 naýryz kúni kómekke ketti.
— Jedel toptyń quramynda 55 adam bar. Sonymen qatar 4 tehnıka, 5 motopompa, 1 úrmeli qaıyq jiberildi, — deıdi tótenshe jaǵdaılar departamentiniń baspasóz qyzmeti.
Jedel top avarııalyq-qutqarý men kezek kúttirmeıtin jumystarǵa jumyldyrylady.
Buǵan deıin, Atyraý oblysynda Jem men Qıǵash ózenderinde sý tasqyny qaýpi joǵary ekeni anyqtalǵan edi. Osyǵan oraı atalǵan sý aıdyndarynyń mańynda ornalasqan eldi mekenderdi qorǵaý úshin qajetti sharalar qabyldanǵan edi.
Sý tasqyny kezindegi zalaldy joıý úshin 1 511 adam, 244 tehnıka, 187 motopompa, 20 júzý quraly, 3 tikushaq ázir tur. Sondaı-aq 48,5 tonna janar-jaǵarmaı, 235 tonna ınertti materıal, 866 myńnan astam qapshyq, 69 dana shatyr, 5 myńnan astam tósek jabdyǵy daıyndalǵan. Turǵyndardyń qaýipsizdigi úshin 200 evakýatsııalyq pýnkt ázirlendi.