Mańǵystaýlyq kásipkerler halyqqa qyzmet kórsetý ortalyqtarynyń zańsyz qyzmetine shaǵymdandy
AQTAÝ. KAZINFORM – Kásipkerler «Jobalanatyn jer ýchaskesin jyljymaıtyn múliktiń birińǵaı memlekettik kadastry aqparattyq júıesiniń grafıkalyq dırekterimen kelisý» memlekettik qyzmetin ala almaı júrgenin aıtady.
- Jaýap berý tártibi standartqa saı 180-buıryqta kórsetilgen. Eger memlekettik qyzmetti berýden bas tartsa, naqty sebebi kórsetilýi kerek. Mysaly, qansha metr sáıkes kelmeı tur, shekaralar bir-birimen qabattasyp ketken degen sııaqty. Bul – jer ýchaskesiniń shekarasy basqa ýchaskemen qabattasyp jatyr ma, joq pa, sony anyqtaıtyn memlekettik qyzmettiń túri. Biz sol qyzmetti ala almaı júrmiz. «Azamattarǵa arnalǵan úkimet» bul qyzmet túrin berýden zańsyz bas tartyp otyr, - deıdi jeke kásipker Jandos Qojabaev.
Quqyǵymyz zańsyz shekteldi degen 9 adam kásipkerler palatasyna shaǵymdanǵan. Mamandar bul máselede memlekettik standartqa sáıkes kásipkerdiń suraýy boıynsha qujattarynda qatelikter bolsa, naqty kórsetilip, keri qaıtarylýy tıis ekenin aıtady. Alaıda «Azamattarǵa arnalǵan úkimet» Mańǵystaý oblystyq fılıalynyń basshylyǵy atalǵan qyzmetke qatysty ótinishterdi qabyldamaý týraly sheshim shyǵarǵan bolyp shyqty.
- Bul hattama eshqandaı resmı qujatqa nemese normatıvtik aktige súıenbeı jasalǵan. Fılıal basshysy qujatty qabyldamaý týraly sheshimdi óz betinshe shyǵaryp, orynbasaryna hattama boıynsha eshkimge ruqsat bermeýdi tapsyrǵan. Biz bul jaǵdaıdy muqııat tekserip shyqtyq, áreketi eshbir buıryqqa nemese zańǵa saı kelmeıdi. Munda laýazymdyq ókilettigin asyra paıdalaný belgileri de bolýy múmkin. Osyǵan baılanysty qazir barlyq qujatty jınap jatyrmyz jáne tıisti quzyrly organdarǵa resmı hat joldaımyz, - deıdi Mańǵystaý oblystyq kásipkerlerdiń quqyqtaryn qorǵaý jáne sybaılas jemqorlyqqa qarsy is-qımyl keńesiniń tóraǵasy Asqar Jaqsybaev.
Al memlekettik qyzmetti ala almaı júrgen kásipkerlerdiń qujattary memlekettik standart boıynsha qaıta qabyldanǵan.
Buǵan deıin, Kaspıı teńiziniń jaǵalaýynan 88 ıtbalyqtyń óleksesi tabylǵany týraly jazǵan bolatynbyz.