Mańǵystaýlyq kásipkerdiń 500 keliden astam balyǵy zańsyz tárkilengen
AQTAÝ. KAZINFORM – Munaıly aýdanynyń turǵyny, jeke kásipker Aıjan Nuǵmanova balyq óńdeýmen aınalysady. 10 aqpan kúni onyń Baıandy aýylynda ornalasqan tsehyna ishki ister bóliminiń 16 qyzmetkeri kelip, jedel profılaktıkalyq is-sharasyn ótkizip jatyrmyz dep 584 keli balyqty tárkilep, alyp ketken.
Onyń 400 kelisi skýmbrııa, qalǵany bekire tuqymdas balyqtar.
- «Jigitter, ne boldy?» dep suraǵanymda, «Jedel aldyn alý is-sharasyn ótkizip jatyrmyz, bizge jedel aqparat tústi» dedi. Sosyn men «sanktsııańyz qaıda?» dedim. Qandaı qujattaryńyz bar dep suraǵanymda, ózderiniń qyzmettik kýálikterin kórsetti. Meni tsehtan ıterip, shyǵaryp jiberdi, - deıdi kásipker.
Kásipkerdiń aıtýynsha, polıtseıler tsehtyń ishin astan-kestenin shyǵaryp, qaqtalyp, tuzdalǵan balyqtardy qapshyqtarǵa salyp, búldirgen.
- Taýardy talqandaımaı, mán-jáı anyqtalǵansha mór basyp, esigin jaýyp ketýin ótindim. Biraq olar qulaq aspady. Endi ol balyqtar óńdeýge kelmeıdi. Sonyń shyǵynyn ótep bersin, - deıdi jeke kásipker Aıjan Nuǵmanova.
Kásipker ádildik izdep, Bas prokýratýraǵa shaǵymdanǵan. Nátıjesinde kásipkerdiń áreketinde qylmystyq quram joq dep, qylmystyq is toqtatylǵan.
- Zertteý nátıjeleri boıynsha qylmystyq quqyq buzýshylyqtyń bolmaýyna baılanysty sotqa deıingi tergep-tekserýdi toqtatý týraly sheshim qabyldandy. Kásipkerdiń quqyqtary qorǵaldy. Al polıtsııa qyzmetkerleriniń is-áreketterine jaqyn arada tıisti protsestik baǵalaý beriletin bolady, - deıdi Mańǵystaý oblystyq prokýratýrasynyń basqarma prokýrory Ǵanı Boranbaev.
Kásipker balyq óńdeý kásibin damytý úshin 30 mıllıon teńge nesıe alǵan. Sol úshin aıyna 700 myń teńge tóleıdi. Osy oqıǵanyń saldarynan kásibi toqtap, nesıesin tóleı almaı qalǵan. Al zańsyz tárkilengen balyqtyń ózi 4,5 mıllıon teńge turady.
Buǵan deıin, Aqtaýda mektep oqýshylary arasynda janjal bolyp, bir jetkinshek aýyr jaǵdaıda aýrýhanaǵa jetkizilgeni týraly jazǵan bolatynbyz.