Mańǵystaýlyq ekologter Oımasha kóliniń lastanýyna alańdap otyr
AQTAÝ. KAZINFORM — Tabıǵat janashyrlary men quzyrly memlekettik organ ókilderi Munaıly aýdanyndaǵy Oımasha kóliniń ekologııalyq jaǵdaıyna nazar aýdardy.
Óıtkeni, kóldiń aınalasyna qurylys jáne turmystyq qaldyqtardy beıbereket tógý tyıylmaı tur. Al onyń saldaryn sol mańda turatyn turǵyndar tartyp keledi.
Osy máselege oraı, oblystyq ekologııa basqarmasynyń basshysy Armat Júsipqalıev, oblystyq tabıǵat qorǵaý prokýratýrasynyń basshysy Іlııas Sandybaev, Munaıly aýdany ákiminiń orynbasary Nurhan Mustafaev pen Atameken aýyldyq okrýgi ákiminiń orynbasary Abzal Tastanovtyń qatysýymen kóldiń janynda arnaıy kóshpeli jıyn ótkizildi.
Oblystyq ekologııa basqarmasynyń basshysy Armat Júsipqalıevtiń aıtýynsha, Munaıly aýdany men Aqtaý qalasynyń ákimdikterine kóldiń mańyn tazartyp, ruqsatsyz qoqys polıgonyn joıýǵa bir apta ýaqyt berilgen.
— Kóldiń aýmaǵy jartylaı qalaǵa, jartylaı aýdanǵa qarasty. «Taza Qazaqstan» aktsııasy bastalǵaly biraz ýaqyt boldy. Áıtse de ákimdikter osy polıgondy kórmeı otyr. Sondyqtan eskertý berildi. 1 apta ishinde tazartýlary tıis. Oryndalmasa, ákimshilik jaýapkershilikke tartylady, — deıdi ekologııa basqarmasynyń basshysy.
Buǵan deıin, Kaspıı teńiziniń jaǵalaýynda 88 ıtbalyqtyń óleksesi tabylǵany týraly jazǵan edik