Mańǵystaýlyq ekologter aqqýlardyń ólimine qatysty zertteý nátıjesin jarııalady

AQTAÝ. KAZINFORM — Áleýmettik jelilerde Kaspıı teńizi jaǵalaýynda aqqýlardyń qyrylǵany týraly aqparat taraýyna baılanysty Mańǵystaý oblystyq ekologııa departamentiniń zerthanalyq-taldamalyq baqylaý bóliminiń mamandary teńiz sýynan synama alyp, zertteý júrgizgen.

Óli qustar týraly shaǵymdar Saıyn Shapaǵatov aýylynan jáne Aqtaý qalasynan túsken. Osyǵan baılanysty tekserý atalǵan eki eldimekende júrgizildi.

— Atap aıtqanda, bıylǵy 10 aqpanda sý synamalary Saıyn Shapaǵatov aýyly mańynan alyndy. Sondaı-aq, 11 aqpanda Mańǵystaý oblystyq orman sharýashylyǵy jáne janýarlar dúnıesi aýmaqtyq ınspektsııasynyń resmı haty negizinde mamandar Aqtaý jaǵalaýynan qosymsha sý synamalaryn aldy. Zertteý jumystary 4A jáne 14-shaǵyn aýdandarda, sondaı-aq «Prımorskıı» jaǵajaıy mańynda óli aqqýlar tabylǵannan keıin uıymdastyryldy. Alynǵan sý synamalary zerthanalyq taldaýǵa jiberildi. Saraptama qorytyndysy boıynsha sýda lastaýshy zattar anyqtalǵan joq, — dep habarlady ekologter.

Mańǵystaý oblystyq orman sharýashylyǵy jáne janýarlar dúnıesi aýmaqtyq ınspektsııasynyń málimetinshe, aqqýlar ólimi jaǵdaı jappaı sıpatqa ıe emes. Qazir aımaqta qustar kóshi-qony ótýde. Óńirde shamamen 25 myńǵa jýyq qus qystap jatyr.

Buǵan deıin, Mańǵystaýda jaǵalaýdan ólgen aqqýlar tabylǵan bolatyn.

Keıin aımaqta neshe aqqý qyrylǵany belgili boldy.