Mańǵystaýlyq dárigerler júkti áıeldiń júregine ota jasap, ana men balany aman alyp qaldy

AQTAÝ. KAZINFORM - Aımaqta júkti áıeldiń júregine alǵash ret kúrdeli ota jasaldy. Oǵan qosa, dárigerler operatsııany nebári 2 saǵatta aıaqtaǵan.

Úshinshi sábıine aıaǵy aýyr 28 jastaǵy naýqas Jańaózen qalasynyń sanıtarlyq avıatsııasymen oblystyq kópbeıindi aýrýhanasyna shuǵyl jetkizilgen.

Jan-jaqty tekserýden keıin oǵan mıtraldy qaqpaqshanyń jedel ınfektsııalyq endokardıti, mıtraldy qaqpaqsha jetkiliksizdiginiń III-IV satysy jáne ókpe gıpertenzııasy dıagnozy qoıyldy.

Jergilikti kardıohırýrg dárigerler Ulttyq ǵylymı kardıohırýogııa ortalyǵy mamandarymen telemedıtsına arqyly keńes ótkizip, otany Aqtaýda jasaýǵa sheshim qabyldaǵan.

- Naýqasqa mıtraldy qaqpaqshasyn aýystyrý operatsııasyn jasadyq. Maqsatymyz anany da, balany da aman alyp qalý boldy. Sondyqtan operatsııany tez jasaýǵa tyrystyq. Sebebi mundaı ota kezinde ananyń júrek soǵysy ýaqytsha toqtatylady. Sonymen qatar qan suıyltamyz. Bul da qursaqtaǵy balaǵa keri áserin tıgizýi múmkin. Operatsııa kezinde akýsher-gınekologtar ýltradybystyq zertteý jasap, jatyrdaǵy balanyń jaǵdaıyn turaqty baqylaýda ustady. Sonyń nátıjesinde qaýip bolmaı, jaqsy nátıjege qoljetkizdik, - deıdi Mańǵystaý oblystyq kópbeıindi aýrýhanasy júrek qan-tamyr hırýrgııasy bólimshesiniń meńgerýshisi Erbol Kudabaev.

Otany kardıohırýrg dárigerler Aǵzam Aldashev pen Erbol Kudabaev jasaǵan. Olarǵa akýsher-gınekolog ıÝlııa Dosahanova, anestezıolog-reanımatologtar Baqytjan Balǵalıev pen Máýlen Jumadillaev kómektesken.

Búginde naýqastyń jaǵdaıy jaqsy. Júktiligi jalǵasýda.

Buǵan deıin, Mańǵystaýda Kaspıı teńiziniń jaǵalaýynan 279 ıtbalyqtyń óleksesi tabylǵany týraly jazǵan bolatynbyz