Mańǵystaýlyq balyqshylar túnde balyq aýlaýǵa ruqsat suraıdy
AQTAÝ. KAZINFORM – Mańǵystaý oblysy Túpqaraǵan aýdanynyń balyqshylary shaǵym aıtyp, beınejazba túsirgen.
Aıtýlarynsha, qujattary men tehnıkalary talapqa saı bola tura, shekara qyzmeti men balyq qorǵaý qyzmetkerleri aıyppul salyp, túnde balyq aýlaýǵa ruqsat bermeıdi.
- Ártúrli sebeptermen aıyppul salyp otyr. Biz túngi mezgilde qara balyqty aýlaýǵa ruqsat berýdi suraımyz. Shekara qyzmetkerleri mazalamasa deımiz, - deıdi olar.
«Qazaq balyk» Respýblıkalyq balyq sharýashylyǵy jáne akvamádenıet qaýymdastyǵynyń Mańǵystaý oblysy boıynsha fılıalynyń dırektory Danııar Ákimjanovtyń aıtýynsha, zań boıynsha tek kúndiz balyq aýlaýǵa ruqsat berilgen.
- Balyqshylardyń kópshiliginiń ruqsaty bar, biraq túnde aýlaýǵa shyǵýǵa tyıym salynady. Búgin biz osy máseleni bılikpen jáne shekara qyzmetimen talqyladyq. «Memlekettik shekara týraly» Zańnyń 48-babyna sáıkes, teńizge tek kúndizgi ýaqytta shyǵýǵa bolady. Bul qaýipsizdik, qaıǵyly jaǵdaılardyń aldyn-alý úshin kerek. Sondaı-aq, brakonerlermen kúresý úshin mańyzdy, - deıdi Danııar Ákimjanov.
Buǵan deıin, Mańǵystaýlyq balyqshylar balyq qabyldaıtyn pýnktiniń joqtyǵyna shaǵymdanǵan bolatyn.