Mańǵystaýlyq balalar ulttyq qundylyqtardy dáripteıtin lagerde tynyqty
AQTAÝ. KAZINFORM – Mańǵystaýda Aqshuqyr aýylynda bıyl etno lager uıymdastyryldy. Mektep janynan ashylǵan ulttyq lagerde 250 bala jazǵy kanıkýlyn qyzyqty ótkizdi.
– Bizdiń maqsatymyz – mektep oqýshylarynyń jazǵy demalysyn tıimdi uıymdastyryp, ultymyzdyń tunyp turǵan asyl mura, rýhanı baılyǵyn boıyna sińirip, qurmetteýge baýlyp, týǵan halqy men óz memleketine adal qyzmet etetin eljandy tulǵalardy tárbıeleý, – deıdi Aqshuqyr mektep-lıtseıiniń dırektory Qalamqas Qalıqyzy.
«Balbulaq» etno lagerinde birneshe baǵyt boıynsha etno aýyldar qurylyp, túrli úıirmeler uıymdastyrylǵan.
Atap aıtqanda, «Altyn saqa» ulttyq oıyndar aýylynda balalar qazaq halqynyń ulttyq sport túrlerimen tanysyp, túrli saıystarǵa qatysty. Máselen, qyz balalar bes tas oınap jaryssa, uldar asyq, arqan tartys, qazaqsha kúres, qol kúresi, sadaq atý sııaqty jarystarda kúsh synady.
Al «Qulager» jas atbegiler aýylynda balalar qazaqtyń at sportynyń túrlerimen jáne at ábzelderimen tanysyp kókpar, aýdaryspaq, teńge ilý sııaqty oıyndardy oınady.
«Toǵyzqumalaq» jas oıshyldar aýylynda demalýshylar aqyl-oıdy damytýǵa arnalǵan toǵyzqumalaq oıynynyń qyr-syryn túsindi.
Ulttyq lagerdegi etno aýyldardyń biri – «Altyn oımaq» qolóner aýyly. Munda qyz balalar úıirme jetekshilerimen jún tútip, kıiz basý tehnologııasyn meńgerýmen qatar shı toqyp, monshaq, bıserlermen zamanaýı sán buıymdaryn ázirledi.
Al «Qysh Art» qysh óneri aýylynda demalýshylar qyshtan zamanaýı ydystar ázirlep, kıiz ben terige, qum men tasqa túrli sýret saldy.
«Roboarǵymaq» aýylynda jas robotshylar jańa tehnologııalar men gadjetterdi qoldanyp saıystar uıymdastyrdy.
Al, «Balbulaq marjandary» sal-seriler aýylynda demalýshylar dombyra party uıymdastyryp, dombyramen, qobyzben kúı tartyp, án-jyr aıtty.
«Qamajaı» bıshiler aýylynda myń buralǵan bıshiler toby qazaqtyń bı ónerin nasıhattady.
Etno lager ujymy balalar úshin týrıstik baǵytty da nazardan tys qaldyrmady. «Jıhangez» týrıstik ekspedıtsııa aýylynda týrıstik shatyrlar ornatylyp, túrli jattyǵýlar jasaldy.
Al «Taıqazan» ulttyq taǵamdar aýylynda uldar mal soıyp, jilikteýdi úırense, qyz balalar óz qoldarymen baýyrsaq pen taba nan pisirip, et asyp, qazy, jent, qurt, balqaımaq daıyndady.
– Kúnde túrli etno aýylda qonaqta bolyp, ulttyq qundylyqtarymyzben tanysyp jatyrmyz. Jansaıa apaı oıý-órnekterdi oıýdy úıretti. Al Bıbifatıma apaı quıryq maı men ish maıdyń paıdasy týraly aıtty, kóp málimet aldyq, – dedi demalýshylardyń biri Gaýhar Buharbaı.
Balalardyń demalysyn mektep ujymy 50 ge jýyq pedogog uıymdastyrdy.
