Mańǵystaýǵa jyl basynan beri 215 myńǵa jýyq týrıst kelgen
AQTAÝ. KAZINFORM – Týrısterge 6,5 mıllıard teńgege qyzmetter kórsetilgen. Bıyl aımaqqa kelýshiler sany áldeqaıda ósti. Statıstıkalyq málimetter boıynsha jyl basynan beri oblysqa 214 907 týrıst at basyn tiregen. Onyń 15 myńǵa jýyǵy sheteldik, 200 myńy otandyq týrıster.
- Týrızmdi damytý - el ekonomıkasyn damytýdyń negizgi draıverleriniń biri bolyp tabylady. 2024 jyly birinshi jáne ekinshi toqsanda resmı statıstıkalyq málimetter boıynsha, óńirge Qazaqstan men shet elderden 214 907 týrıst keldi. Al ótken jyldyń osy kezeńinde 180 myńǵa jýyq týrıst kelgen eken. Demek bıyl 35 myń adamǵa kóp, - deıdi Mańǵystaý oblystyq týrızm basqarmasy basshysynyń mindetin atqarýshy Gúlsim Jarıeva.
Mamandardyń aıtýynsha, aımaqqa kelgen týrısterdiń kóbi jaz aılarynda Kaspıı teńiziniń jaǵalaýynda ornalasqan demalys oryndarynda demalǵandy unatady. Al, kúz-qys aılarynda týrıstik nysandar men tarıhı oryndarǵa barady. Óńirde týrısterdi ornalastyratyn 100 den astam qonaq úı bar.
- Qazir oblysta 17 týroperator jumys istep jatyr. Olar týrıstik ónimderdi qalyptastyryp, ishki týrızmdi damytý baǵytynda 234 týrıstik marshrýt qalyptastyrdy. Demalys kúnderi turaqty týrlar uıymdastyrylyp, týrısterdi tartý jumystary jalǵasýda, - deıdi basqarma basshysynyń mindetin atqarýshy Gúlsim Jarıeva.
Mańǵystaýda buǵan deıin Kaspıı teńiziniń jaǵalaýynda týrızmdi damytýǵa berilgen 21 jer ýchaskesiniń zańsyz bolyp shyqqanyn jazǵan edik.
