Mańǵystaýǵa saıahat qansha turady: Aqtaýdaǵy demalys, qonaq úı jáne kórikti jerler
AQTAÝ. KAZINFORM — Mańǵystaýǵa saıahattaýdy josparlaǵan týrısterdi Kaspıı jaǵasyndaǵy demalys, erekshe tabıǵı landshafttar, kóne tarıhı oryndar men ulttyq mádenıetpen tanysý múmkindigi kútedi. Mańǵystaý oblysy búginde Qazaqstandaǵy eń tanymal týrıstik baǵyttardyń birine aınalyp keledi.
Aqtaýǵa Astana men Almaty qalalarynan áýe qatynasy arqyly jetýge bolady. Ushý ýaqyty — shamamen 2,5-3 saǵat. Áýe bıletiniń baǵasy maýsymǵa jáne suranysqa qaraı ózgerip otyrady. Orta eseppen bir baǵyttaǵy bılet quny 45-50 myń teńgeden bastalady.
Qalaǵa kelgen týrıster eń aldymen Kaspıı teńiziniń jaǵalaýyna at basyn burady. Aqtaýda zamanaýı jaǵajaılar, demalys oryndary men serýendeýge arnalǵan jaǵalaý aımaqtary bar. Jaz mezgilinde munda kúnge qyzdyrynyp, teńizge shomylyp, sý attraktsıondaryn tamashalaýǵa múmkindik mol. Sonymen qatar jaǵalaý boıyndaǵy dámhanalar men meıramhanalarda jergilikti taǵamdardan dám tatýǵa bolady.
Aqtaýda demalys úshin túrli sanattaǵy qonaq úıler men ornalastyrý oryndary usynylady. Qala men oblys aýmaǵynda 100-den astam týrıstik ornalastyrý nysany jumys isteıdi.
Olardyń qatarynda halyqaralyq jáne otandyq qonaq úı brendteri, jaıly demalys oryndary men zamanaýı glempıngter bar. Qonaq úı baǵasy qyzmet kórsetý deńgeıine qaraı ózgeredi: ortasha eseppen táýliktik quny 30 myń teńgeden bastalyp, joǵary sanattaǵy oryndarda 200 myń teńgeden asýy múmkin.
Aqtaýǵa kelgen saıahatshylar tek teńiz jaǵalaýymen shektelmeı, Mańǵystaýdyń tabıǵı ǵajaıyptaryn aralaı alady.
Týrıster arasynda erekshe suranysqa ıe baǵyttardyń biri — Bozjyra shatqaly. Aq borly jartastar men erekshe pishindi taýlarymen tanymal bul meken óńirdiń basty sımvoldarynyń birine aınalǵan.
Sondaı-aq saıahatshylar Qyzylkúp alqabyn, Boqty taýyn, Aıraqty — Shomanaı taýlaryn, Torysh shatqalyndaǵy shar tárizdi tastar alqabyn jáne Sherqala taýyn tamashalaı alady.
Bul oryndar tabıǵatty súıetinder men foto saıahatqa qyzyǵatyn týrıster úshin erekshe áser syılaıdy.
Mańǵystaýǵa kelgen qonaqtar óńirdiń rýhanı murasymen de tanysa alady. Beket ata, Shopan ata, Qaraman ata, Sultan — úpi jáne Shaqpaq ata jerasty meshitteri — tarıhı ári qasıetti oryndardyń qatarynda.
Týrısterge yńǵaıly bolý úshin oblysta 248 týrıstik marshrýt ázirlengen. Baǵyttar tabıǵı kórikti jerlerdi, tarıhı eskertkishterdi jáne sakraldy oryndardy qamtıdy.
Sonymen qatar óńirde 22 týroperator jumys istep, bir kúndik jáne birneshe kúnge arnalǵan tanymdyq, ekologııalyq jáne zııarat baǵytyndaǵy saparlardy uıymdastyrady.
Mańǵystaýǵa birneshe kúnge saıahattaýdy josparlaǵan týrıstiń shyǵyny tańdalǵan baǵyt pen demalys formatyna baılanysty bolady. Orta eseppen bir adamǵa 3-4 kúndik sapar úshin áýe bıleti, qonaq úı, tamaqtaný jáne ekskýrsııalyq baǵyttardy eseptegende shamamen 250-350 myń teńge kóleminde qarajat qajet bolýy múmkin.
Eger týrıst tek Aqtaý qalasynda demalyp, Kaspıı jaǵalaýynda ýaqyt ótkizýdi josparlasa, shyǵyn kólemi azyraq bolady.
Al Bozjyra shatqaly, Sherqala taýy, Torysh alqaby sııaqty tabıǵı nysandarǵa ekskýrsııa qosylǵan jaǵdaıda kólik pen gıd qyzmetine qosymsha qarajat qajet.
Buǵan deıin Aqmola oblysynda týrıstik maýsym resmı túrde ashylǵan bolatyn.
