Mańǵystaýdyń kórikti jerleri beınelengen fotokórme 20 kún boıy ótedi
Mańǵystaýdyń kórikti jerleri beınelengen «Mars peızajdary» atty kórme ótti, dep habarlaıdy QazAqparat tilshisi.
Kórmeni óńirlik týrızm basqarmasynyń tapsyrysymen «National Geographic Qazaqstan» jýrnaly uıymdastyrdy. Basty maqsat – óńirimizdiń týrıstik áleýetin halyqaralyq deńgeıde tanytyp, buqaralyq aqparat quraldary men áleýmettik jelilerde nasıhattalýyn ilgeriletý.
«Joba aıasyndaǵy jarnamalyq-aqparattyq ekspedıtsııaǵa elimizge belgili fotosheberler qatysyp, ólkemizdiń kıeli hám kórikti oryndaryna arnaıy saparlar uıymdastyryldy. Osy ekspedıtsııanyń qorytyndysy boıynsha ázirlengen «Mars peızajdary» atty arnaýly fotokórme Aqtaý qalasynyń qonaqtary men jurtshylyǵyna usynylyp otyr. Kórmeniń saltanatty ashylýy bolyp, qyzyl lenta qıyldy. Óte joǵary deńgeıde ótip jatyr. Іs-sharaǵa kelgen oblys, qala turǵyndaryna alǵys aıtamyz», - dedi Mańǵystaý oblysy týrızm basqarmasy «Týrızmdi ilgerletý jáne damytý» bóliminiń basshysy Gúlsim Jarıeva.
Kórmege qala turǵyndarynan bólek shetelden kelgen ıtalııandyq, reseılik azamattar da kórermen boldy. Olar mańǵaz mekenniń kórikti jerlerin sýretten kórip-aq tamsanǵanyn aıtty.
«Men Aqtaý qalasyna alǵash ret keldim. Qalany aralap júrip kórmege tap boldym. Óte ádemi sýretter, sátti kadrlar jınalypty. Jaqynda ǵana Mańǵystaýdyń Ybyqty saı shatqalynda boldym. Endi keleside osy sýretterde beınelengen kórikti jerlerge barýdy josparlap otyrmyn», - dedi reseılik kórermen Natalıa Ýtına.
Aıta keteıik, atalǵan kórme 20 kún boıy Aqtaý qalasyndaǵy 4-shaǵynaýdanda ornalasqan «Shým» saýda ortalyǵynyń 2-qabatynda kórermen nazaryna usynylady.
