Mańǵystaýdyń ekonomıkasy munaı-gaz salasyna ábden táýeldi bolyp qaldy – óńir basshysy

ASTANA. KAZINFORM – Mańǵystaýdyń ekonomıkasy munaı-gaz salasyna ábden táýeldi bolyp qaldy. Bul týraly Mańǵystaý oblysynyń ákimi Nurdáýlet Qılybaı «Jibek Joly» telearnasynyń «Ýáde» baǵdarlamasyna bergen suhbatynda aıtty.

«Keshe ǵana 85 jyldyq mereıtoıyn atap ótken ǵulamamyz Ábish Kekilbaev bir sózinde: «bizdiń baǵymyzǵa da, sorymyzǵa da bergeni - munaı», degeni bar. Shyndyǵynda da keńes dáýirinen bastap, búginge deıin Mańǵystaýdyń ekonomıkasy munaı-gaz salasyna ábden táýeldi bolyp qaldy, ony moıyndaımyz. Qazirdiń ózinde halyqty qabyldaǵanda jastardyń, turǵyndardyń kópshiligi munaı-gaz salasynan jumys suraıdy. Bul salada jalaqy da, áleýmettik qamsyzdandyrý da táýir. Al shaǵyn jáne orta bıznes durys damymaı otyr. Mysaly, munaı men gazy joq óńirlerde kásipkerlik bizge qaraǵanda álde qaıda jaqsy damyǵan», - dedi óńir basshysy.

Degenmen, oblys ákimi týrızmdi damytý arqyly shaǵyn jáne orta bıznestiń tamyryna qan júgirtýge bolatyndyǵyn aıtady. Al ol úshin jastardy bızneske baýlý kerek.

«Onsyz bolashaq joq. Erte me, kesh pe soǵan táýeldi bolamyz. «Aýyl amanaty» degen baǵdarlama bar. Baǵdarlama qolǵa alynǵan alǵashqy jyly Mańǵystaý oblysy 800 mln teńge alsa, odan keıin 1,2 mlrd teńgege jetti. Qazir aýyldardan suranys kóp. Óıtkeni, shaǵyn jáne orta bıznes ashýǵa nıetti turǵyndardyń qarasy qalyń. Endi 1,8 mlrd teńge surap otyrmyz. Bul baǵdarlamanyń aýyldyq jerge tıgizetin áseri óte joǵary. Búginde Mańǵystaý halqy neni kóp tutynatynyn, qandaı nársege qarajat kóp jumsaıtyndyǵyn zerttep jatyrmyz. Mine solardy ózimizde ashýymyz kerek», - dedi Nurdáýlet Qılybaı.