Mańǵystaýdyń Beıneý aýdanynda bir túnde 126 qoı qyryldy
AQTAÝ. KAZINFORM — Mańǵystaý oblysynyń Beıneý aýdanynda bir túnde 126 qoı qyrylyp qaldy. Aldyn ala málimet boıynsha, mal bir jerge jınalǵan jańbyr sýyn ishken.
Mańǵystaý oblystyq veterınarııalyq basqarmasy Beıneý aýdandyq veterınarııalyq stantsııasynyń basshysy Nuraly Sádiǵulovtyń málimetinshe, oqıǵa týraly 28 qyrkúıekte saǵat 10:00 shamasynda turǵyndardan habarlama túsken. Mamandar oqıǵa ornyna baryp, ólgen maldyń sanyn anyqtaǵan.
— Bul — 10 shaqty otbasynyń maly. Qoılardy bir baqtashy kezekpen jaıylymǵa shyǵaryp otyrǵan. Barlyǵy 210 qoı bolǵan, onyń 126-sy bir túnde qyrylyp qalǵan. Qalǵan 84 qoıdyń jaǵdaıy jaqsy. Juqpaly aýrý belgileri baıqalmaıdy. Qazir olar jaıylymǵa shyǵaryldy, — deıdi maman.
Oqıǵa ornyna aýdandyq veterınarııalyq stantsııanyń mamandary baryp, ólgen maldan jáne qoılar sý ishken jerden sý synamalaryn alǵan.
Qazir alynǵan synamalar aýdandyq zerthanaǵa tapsyryldy. Maldyń qyrylý sebebi zerthanalyq saraptamadan keıin belgili bolady.
Buǵan deıin, Qaraǵandy oblysynda soǵym maýsymy qarsańynda mal urlyǵyna qarsy 19 blok-beket qoıylǵan bolatyn.
