Mańǵystaýdy ózgertetin ıdeıalar: 120 jas bir aptada 9 joba ázirledi

Berilgen tapsyrmalar boıynsha ár komanda bir jyl ishinde júzege asyrýǵa bolatyn, quny 5 mıllıard teńgege deıingi bıznes-joba usynýy kerek. Baǵdarlamanyń bir baǵyty jastardyń jasandy ıntellekt quraldaryn is júzinde qoldanýyna arnaldy.

Lager 10–17 tamyz aralyǵynda ótti, ony Tımýr Qulybaevtyń Halyk qaıyrymdylyq qorynyń «Tálimger» mansap jáne kásipkerlikti damytý ortalyǵy uıymdastyrdy. Lagerge Mańǵystaý oblysynan «Tálimger» ortalyǵynda jyl boıyna ótken baıqaýlar men jobalarda úzdik nátıje kórsetken 120 oqýshy men stýdent qatysty. Sondaı-aq kásibı baǵdar berýshi muǵalimder arasyndaǵy saıys jeńimpazdary arnaıy joldamaǵa ıe boldy. Qatysýshylar toǵyz komandaǵa bólindi.

Jasandy ıntellekt arqyly mamandyqtardy zerttedi

«BOLASHAQ ME» ádettegi dáristerden góri tájirıbege negizdeldi. Bir apta ishinde qatysýshylar komandalyq kvestterden ótip, dızaın-oılaý ádisterin meńgerdi, bıznes-keısterdi taldap, kásipkerlik jáne áleýmettik jobalar ázirledi. Baǵdarlamanyń mańyzdy baǵyttarynyń biri – kásibı baǵdar jáne jasandy ıntellekt quraldaryn paıdalaný boldy.

«Mamandyqtar stantsııasynda» jastar JI kómegimen túrli kásipti zerttep, ár salaǵa qajetti bilim men daǵdylaryn, eńbek naryǵyndaǵy múmkindikterdi taldady.  Jastar lagerde sarapshylarmen jáne kásipkerlermen de kezdesti.  «Rıza Ana» qaıyrymdylyq qorynyń dırektory Bıbigúl Ramazanova jastarmen áleýmettik kásipkerlik taqyrybynda tájirıbesimen bólisti.

Lagerge qatysqan Aısultan úshin eń mańyzdy tájirıbeniń biri – óz oıyn kópshilik aldynda jetkizýdi úırený bolǵan.

-Lagerge kelgende óz oıymdy kópshilik aldynda aıtý qıyn boldy. Komandamen jumys istegen saıyn pikirińdi aıtýdan qoryqpaý kerek ekenin túsindim.  Eń mańyzdysy – ıdeıa týraly jaı aıtyp qana qoımaı, ony iske asyrý úshin áreket etý kerektigin úırendim, – deıdi ol.

5 mıllıard teńge jáne bir jyl

Jeti kúndik baǵdarlamanyń sońynda komandalarǵa Mańǵystaýdyń áleýmettik-ekonomıkalyq jaǵdaıyn ońaltatyn bıznes-joba ázirleý tapsyryldy. Jobalar túrli salalardy qamtydy. Qatysýshylar ıdeıanyń qundylyǵyn dáleldep, alǵashqy pılottyq josparyn usyndy. 

Erekshe balalarǵa arnalǵan joba jeńiske jetti

Birinshi oryndy «Phoenix» komandasynyń TORSYQ Town jobasy ıelendi. Olar Aqtaýda mádenıet, týrızm, shyǵarmashylyq jáne ınklıýzııany biriktiretin áleýmettik ortalyq qurýdy usyndy.

Jobanyń maqsaty – erekshe qajettiligi bar balalardyń tegin bilim alyp, shyǵarmashylyqpen aınalysýlaryna múmkindik jasaý. Komanda 5 mıllıard teńgelik ınvestıtsııa arqyly iske asatyn ortalyqtyń keıin týrızmnen túsetin tabys esebinen ózin-ózi qarjylandyratyn áleýmettik bızneske aınalý modelin ázirledi. Sarapshylar bul jobany úzdik dep tanydy.

Ekinshi oryn «Spider» komandasynyń MANGYSTAU AGRO jobasyna buıyrdy. Bul jobanyń avtorlary Mańǵystaýdaǵy sý tapshylyǵy men mal sharýashylyǵy máselelerine tehnologııalyq sheshim usyndy. Joba sýdy únemdeý, jańartylatyn energııa kózderin paıdalaný jáne Smart mal sharýashylyǵyn damytýǵa baǵyttalǵan.

Úshinshi oryndy «Red Flag» komandasynyń Inclusive Medical Center jobasy aldy. Bul – erekshe qajettilikteri bar balalar men jasóspirimderge arnalǵan medıtsınalyq-áleýmettik ortalyq. Onyń ereksheligi – mamandar balamen ǵana emes, olardyń ata-analarymen de jumys isteıdi. Shalǵaı aýdandardan keletinderge jataqhana qarastyrylǵan.

Qalǵan komandalar da Mańǵystaýǵa qatysty ózge de máselelerdi kóterdi. Olardyń arasynda Kaspıı jaǵalaýyndaǵy tsıfrlyq qaýipsizdikti qamtamasyz etetin QUTQAR AI, óńirdiń ekologııalyq problemalaryna arnalǵan MangystauECO, týrızm qyzmetterin bir platformaǵa biriktiretin «MAŃǴYSTAÝ TUR», shalǵaı eldi mekenderdegi bilimge qoljetimdilikti arttyrýǵa baǵyttalǵan «Bilim kerýeni» sekildi bastamalar bar.

Toǵyz jobanyń jalǵasy qandaı bolmaq

Lager sońynda qatysýshylarǵa sertıfıkattar tabystaldy, jeńimpaz komandalar dıplomdarmen jáne syılyqtarmen marapattaldy.

Fınaldyq kezeń jobanyń aıaqtalǵanyn bildirmeıdi. Aldaǵy oqý jylynda «Tálimger» ortalyǵynda qatysýshylarmen jumys jalǵasyp, jastarǵa ıdeıalaryn odan ári pysyqtaýǵa, damytýǵa jáne jobalyq daǵdylaryn jetildirýge baǵyt-baǵdar beriledi.

«Tálimger» baǵdarlamasynyń basshysy Aıgúl Ahmetova lager nátıjesin tek jeńimpazdar sanymen baǵalaýǵa bolmaıtynyn aıtady.

-Osy jeti kúnde jastar bir-birinen kóp nárse úırendi.  Biz úshin osy ózgeristiń ózi qundy. Aldaǵy ýaqytta qatysýshylar bizdiń ortalyqtan óz ıdeıalaryn odan ári pysyqtap, damytýǵa baǵyt-baǵdar alady. Biz jastardyń jobalyq oılaýyn damytýǵa, ıdeıasyn júıeleýge jáne ony naqty bastamaǵa aınaldyrý joldaryn úırenýine múmkindik jasaıtyn bolamyz, – dedi ol.

«Tálimger» jobasy jyl boıy oqýshylar men stýdentterdiń kásibı baǵdar alýyna, kásipkerlik jáne kóshbasshylyq daǵdylaryn damytýyna múmkindik beredi.