Mańǵystaýdaǵy Jarma aýylynda qum kóshkinin toqtatý jumystary nátıje bere bastady
AQTAÝ. KAZINFORM – Mańǵystaý aýdanyndaǵy Jarma, Sazdy jáne Saýysqan eldi mekenderi bir-birine jaqyn ornalasqan, qum basý qaýpi joǵary aýyldar bolatyn. Osydan 7 jyl buryn osy eldi-mekenderdiń aýmaǵyn qum kóshkininen qorǵaý boıynsha 6 jyldyq joba jasaqtaldy.
Eki kezeńge josparlanǵan jobanyń alǵashqy kezeńi 2022-2024 jyldar aralyǵynda júrgizildi. 60,34 gektar aýmaqqa 203 634 túp sekseýil men júzgin aǵashtary egilip, shyǵymdylyǵy 85-90 paıyzdy quraǵan.
Jarma aýylynyń turǵyny Aldaberdi Aqshabaevtyń aıtýynsha, qazirdiń ózinde qum edáýir toqtaǵan. Jaýapty mamandar arasynda kelip, tekserip turady eken.
- Qumnyń jıegi orman bolyp ketti. Ony sharbaqpen qorshap qoıdy. Ushtaǵannyń jigitteri bar, Jarmanyń basynda da eki jaýapty turǵyn bar, solar sharbaqtardy tekserip, qulaǵan jerin jóndep otyrady. Sekseýil egip jatyr. Bıyl jańbyr kóp bolyp, ósimdikter jaqsy shyqty, - deıdi aqsaqal.
Jarma aýylynda qum kóshkinin toqtatý jobasynyń ekinshi kezeńi 2025-2027 jyldarǵa josparlanǵan. Endi 73,74 gektar aýmaqqa 248 887 sekseýil men júzgin aǵashtary otyrǵyzylady.
Qazir jumys júrip jatyr.
Mańǵystaý oblystyq tabıǵı resýrstar jáne tabıǵat paıdalanýdy retteý basqarmasy basshysynyń orynbasary Haıdar Tóleýshovtiń aıtýynsha, aımaqta qum toqtatý jumystary 2004 jyldan beri júrgizilip keledi. Ushtaǵan aýylynda 2007 jyly, Tuşyqudyq aýylynda 2012 jyly al Shebir aýylynda 2016 jyly bastalyp, sekseýil ósirý jumystary 2021 jylǵa deıin júrgizilgen.
Al, Senek aýylynda 2004 jyly bastalyp, 2022 jyly aıaqtalǵan.
- Nátıjesinde Ushtaǵanda - 648,8 gektar, Tuşyqudyqta - 847,4 gektar, Shebir aýylynda - 451,8 gektar, Senek aýylynda 1288 gektar jer ıgerildi. Jalpy alǵanda, shól alqaptaǵy tórt aýyldyń aınalasynda - 3329 gektar jasyl jelekter paıda boldy, - deıdi oblystyq tabıǵı resýrstar jáne tabıǵatty paıdalanýdy retteý basqarma basshysynyń orynbasary Haıdar Tóleýshov.
Mańǵystaýda shóleıttenýge beıim aýyldar kóp. Memleket basshysynyń tapsyrmasymen byltyr Beıneý aýdanynyń Tájen, Syńǵyrlaý, Sam, Turysh jáne Aqjigit aýyldarynda, Qaraqııa aýdanynyń Senek pen Bostan aýyldarynda, Mańǵystaý aýdanynyń Jarmysh jáne Aqshymyraý aýyldarynda, Túpqaraǵan aýdanynyń Taýshyq eldi-mekeninde qaýipti eoldyq protsesterdiń damý qaýpin anyqtaý maqsatynda, jobany ǵylymı negizdeý jáne qyzmet smetasyn ázirleý boıynsha jumystar júrgizilgen.
Atalǵan aýyldardyń shóleıttenýine qarsy jumystar bıyl bastalyp, sekseýil ósirý jumystary kezeń-kezeńimen júrgiziledi.
Buǵan deıin, Mańǵystaýda birneshe eldi-mekenge qum kóshkininiń astynda qalý qaýpi tónip turǵany týraly jazǵan bolatynbyz.