Mańǵystaýdaǵy vandalızm: Tarıhı jádigerlerdi qorǵaýdyń quqyqtyq tetikteri qandaı
ASTANA. KAZINFORM — Mańǵystaý oblysyndaǵy ejelgi petroglıfterdiń vandaldar qolynan búlinýi qoǵamda úlken talqy týdyrdy. Myńdaǵan jyldyq tarıhy bar jádigerlerge salynǵan jazýlar ulttyq qundylyqtarǵa jasalǵan qastandyq retinde baǵalanyp otyr.
Mádenıet jáne aqparat mınıstrligi men quqyq qorǵaý salasynyń mamandary tarıhı murany saqtaý erejeleri men vandalızm úshin qoldanylatyn jazanyń qatańdatylǵanyn málimdedi.
QR Mádenıet jáne aqparat mınıstrligi Tarıhı-mádenı mura basqarmasynyń basshysy Azamat Jolaevtyń aıtýynsha, elimizdegi barlyq mádenı nysandar memleket qorǵaýynda.
Eskertkishter tizimine engen nysannyń aınalasynda arnaıy qorǵaý aımaqtary belgilenip, onda kez kelgen qurylys nemese sharýashylyq jumystaryn júrgizýge tyıym salynady.
— Eskertkishterdiń tehnıkalyq jaı-kúıi jylyna keminde bir ret tekseriledi. Arnaıy pasporttar men esep kartochkalary nysannyń bastapqy tarıhı kelbetin tirkep otyrady. Bul vandalızm aktisi oryn alǵan jaǵdaıda, keltirilgen zalaldy dál anyqtaýǵa múmkindik beredi, — dedi Azamat Jolaev Jibek Joly telearnasynyń Búgin.LIVE baǵdarlamasynda.
Maman Mańǵystaýdaǵy jaǵdaıǵa toqtala kele, búlingen petroglıfter erte temir dáýirine jatatynyn, endi olardy zerdelep, aldyn ala esepke alý tizimine engizý jumystary júrgiziletinin atap ótti.
Zańger Baýyrjan Aıymbetov 2024 jyldyń 5 shildesinen bastap vandalızm úshin jazanyń aıtarlyqtaı qatańdatylǵanyn alǵa tartty. Eger buryn bul bap boıynsha túrmege jabý qarastyrylmasa, qazir sanktsııalar kúsheıtilgen.
— Qylmystyq kodekstiń 294-baby boıynsha vandalızm úshin aıyppuldan bastap, 3 jylǵa deıin bas bostandyǵynan aıyrý jazasy qarastyrylǵan. Ásirese, adamdar tobymen, aldyn ala sóz baılasý arqyly nemese ulttyq, násildik arazdyq týdyrý maqsatynda jasalǵan áreketterdiń jazasy óte qatań, — dep túsindirdi zańger.
Mamandar qoǵamdyq oryndardaǵy múlikti búldirý men tarıhı jádigerlerge zııan keltirýdiń quqyqtyq aıyrmashylyǵy bar ekenin eskertedi.
Mádenı mura nysandaryn qorlaý — qylmystyq is (QK 294-baby), al qoǵamdyq oryndardaǵy tártipsizdik — usaq buzaqylyq (ÁQBtK 434-baby) retinde saralanady.
— Usaq buzaqylyq: 5 AEK-ten bastalatyn aıyppul jáne materıaldyq shyǵyndy óteý.
— Kámeletke tolmaǵandar úshin: 16 jasqa tolmaǵan jasóspirimderdiń áreketi úshin ata-anasyna 15 AEK mólsherinde aıyppul salynady (ÁQBtK 448-baby).
Sarapshylar tek jazany kúsheıtip qana qoımaı, mektep qabyrǵasynan bastap ulttyq murany qasterleýdi úıretý kerek degen pikirde.
Aıta keteıik, elorda polıtsııasy qaladaǵy vandalızmniń 70 deregin tirkegenin habarlaǵan edik.
