Mańǵystaýdaǵy sarbaz óliminen soń shekara bólimshesiniń bastyǵy sottaldy
AQTÓBE. KAZINFORM — «Ústirt» shekara bólimshesiniń bastyǵy 2 jylǵa bas bostandyǵynan aıyryldy. Sonymen birge sottalýshy jábirlenýshi tarapqa 10 mln teńge moraldyq shyǵyndy tóleýi tıis.
Іs Aqtóbe oblystyq áskerı sotynda qaraldy. «Ústirt» shekara bólimshesiniń bastyǵy Q.Asýǵa Qylmystyq kodekstiń «Qyzmetke salǵyrt qaraý» baby boıynsha aıyp taǵyldy.
Sot kabınetindegi is materıalyna súıensek, oqıǵa 2025 jyldyń qazan aıynda Mańǵystaý oblysy Qaraqııa aýdanyna qarasty «Ústirt» shekara bólimshesinde boldy. Bólimshe bastyǵy Q.Asý dızel agregatynyń isten shyqqanyn bilip, ony tazartýdy eki sarbazǵa tapsyrady. Jaryq joq kezde, kesh qaraıa mundaı jumysty atqarý qaýipti ekenin bile tura júktemeni oryndaýdy buıyrady.
Tehnıkalyq qaýipsizdik erejesin túsindirmesten eki sarbazdyń janar-jaǵarmaı qoımasyna kirýine ruqsat beredi. 2025 jyl 6 qazan kúni saǵat shamamen 19:40–ta sarbazdyń biri qolyna janar-jaǵarmaı quıatyn eki ydysty alyp, qoımaǵa jalǵyz kiredi. Syıymdylyǵy 4 tonnalyq tsısternaǵa baryp, joǵary minip, qaqpaǵyn ashady. Ydysyn ishine salyp, ony toltyryp almaq bolǵan sarbaz benzın býyna ýlanyp, esinen tanǵan qalady. Sol kúıi 20 mınýt boıy jatqan.
Keıin onyń bul kúıin ózge sarbazdar kórip, tómen túsiredi, áskerılerdi shaqyrady. Alǵashqy medıtsınalyq kómek kórsetilgenimen, sarbaz esin jımastan kóz jumdy.
Sot otyrysynda sottalýshy Q.Asý ózine taǵylǵan aıypty tolyq moıyndady. Oqıǵa ornyna Qorǵanys mınıstrliginiń tikushaǵy jetken. Alaıda dárigerler sarbazdyń bir nemese bir jarym saǵat buryn jan tapsyrǵanyn habarlaǵan.
Al sarbazdyń anasy ulynyń medıtsınalyq kolledjde feldsher mamandyǵyn alǵanyn, sportshy ári belsendi bolǵanyn aıtty. 2025 jyldyń naýryz aıynda ásker qataryna alynyp, úsh aı boıy Almatyda oqý kýrsynan ótken. Ant qabyldaǵan soń Mańǵystaý oblysynyń shekara bólimshesine baǵyttaldy. Áskerı qyzmetshi bolýdy armandaǵan.
Sot sottalýshy Q.Asýdy Qylmystyq kodekstiń «Qyzmetke salǵyrt qaraý» baby boıynsha aıypty dep tanyp, 2 jylǵa bas bostandyǵynan aıyrý jazasyn taǵaıyndady. Jábirlenýshiniń azamattyq talap aryzy ishinara qanaǵattandyryldy. Sottalýshy jábirlenýshi tarapqa 10 mln teńge moraldyq shyǵyndy óteýi tıis.
Sot úkimi zańdy kúshine engen joq.
Aıta keteıik, byltyr Mańǵystaý oblysynda sarbaz qaıtys boldy. UQK Shekara qyzmeti sol kezde sarbaz ólimine tehnıkalyq jumystar kezindegi qaýipsizdik sharalarynyń saqtalmaýy sebep bolǵanyn aıtty.
