Kaspııdegi áskerı oqý-jattyǵý kezinde 9 áskerı qyzmetshi qaza tapty
ASTANA. KAZINFORM — Aldyn ala málimet boıynsha teńizge 19 áskerı qyzmetshini alyp ketken. Qazirgi ýaqytta onyń 9-y ókinishke qaraı kóz jumdy.
— 24 qyrkúıek kúni Mańǵystaý oblysynda Qazaqstan Respýblıkasy Qarýly kúshteri Áskerı-teńiz kúshteriniń oqý-jattyǵýy kezinde Kaspıı teńiziniń jaǵalaýynda oqý-jaýyngerlik mindetterdi oryndaý barysynda aýa raıynyń kúrt nasharlaýy jáne jeldiń kúsheıýine baılanysty áskerı qyzmetshilerdi teńizge alyp ketkenin aýyr kúrsinispen habarlaımyz.
Aldyn ala málimet boıynsha teńizge 19 áskerı qyzmetshini alyp ketken. Qazirgi ýaqytta onyń 9-y, ókinishke qaraı qaza boldy. Úsh áskerı qyzmetshi qutqaryldy, olardyń bireýi aýrýhanaǵa jatqyzyldy. Qalǵandaryn izdestirý jumystary júrgizilip jatyr, — delingen Qorǵanys mınıstrliginiń habarlamasynda.
Oqıǵa ornyna qutqarý qyzmetteriniń kúshteri men quraldary dereý jiberildi. Іzdestirý-qutqarý jumystaryna Áskerı-teńiz kúshteriniń, Tótenshe jaǵdaılar mınıstrliginiń bólimsheleri, avıatsııa jáne basqa da tıisti qyzmetter jumyldyryldy.
— Oqıǵanyń barlyq mán-jaıyn anyqtaý jáne izdestirý-qutqarý jumystaryn úılestirý úshin oqıǵa ornyna Qazaqstan Respýblıkasynyń Qorǵanys mınıstri avıatsııa general-leıtenanty Dáýren Qosanovtyń basshylyǵymen Qorǵanys mınıstrliginiń komıssııasy shuǵyl attandy.
Qazaqstan Respýblıkasynyń Qorǵanys mınıstrligi qaza bolǵan áskerı qyzmetshilerdiń týǵan-týystary men jaqyndaryna qaıǵyryp kóńil aıtady. Qaza bolǵandardyń otbasylaryna qajetti barlyq kómek pen qoldaý kórsetiledi. Іzdestirý jumystarynyń barysy men áskerı qyzmetshilerdiń jaǵdaıy týraly qosymsha aqparat derekter túsýine jáne rastalýyna qaraı beriledi.
Qazaqstan Respýblıkasy Qorǵanys mınıstrligi men basqa da memlekettik organdardyń tek resmı aqparatyna súıenýdi suraımyz, — delingen habarlamada.
Aıta ketelik Kaspııde áskerı teńizshiler áýe jáne sýasty qaterlerine qarsy jattyǵý ótkizgen edi.
