Mańǵystaýdaǵy munaı-gaz kásipornynda jospardan tys tekseris bastaldy
ASTANA. KAZINFORM — Mańǵystaý oblysy tótenshe jaǵdaılar departamentiniń ónerkásiptik qaýipsizdik basqarmasy «Tenge Oil&Gas» seriktestigine qarasty qaýipti óndiristik nysandarda jospardan tys tekseris júrgizip jatyr.
Basqarmanyń baspasóz qyzmeti málim etkendeı, bul is-shara buǵan deıin berilgen talaptardyń oryndalý barysyn qadaǵalaý maqsatynda uıymdastyryldy. Atalǵan kemshilikter buryn júrgizilgen ınspektsııa kezinde tirkelgen bolatyn.
Qazir mamandar usynylǵan eseptik derekterdiń óndiristegi shynaıy jaǵdaıǵa sáıkestigin muqııat zerttep jatyr. Kompanııa basshylyǵynyń qaýipsizdik salasyndaǵy eskertýlerdi qanshalyqty sapaly oryndaǵany jan-jaqty zerdelenedi. Óńirdegi jer qoınaýyn paıdalaný aımaqtarynyń avarııasyz jumys isteýin qamtamasyz etý máselesi ýákiletti organdardyń qatań nazarynda tur.
— Tekserý qorytyndysy kásiporynnyń óndiristik qýattardy ári qaraı qaýipsiz paıdalanýǵa daıyndyǵyn kórsetedi. Eger zańbuzýshylyqtar joıylmaǵany anyqtalsa, kináli tarapqa qoldanystaǵy zańnamaǵa sáıkes tıisti ákimshilik sharalar qabyldanady. Bul baqylaý sharalary óndiristegi jaǵymsyz jaıttardyń aldyn alýǵa jáne eńbek qaýipsizdigin arttyrýǵa baǵyttalǵan, — delingen vedomstvo habarlamasynda.
Budan buryn Qazaqstan 26 munaı-gaz ýchaskesin aýktsıonǵa shyǵaratyny aıtyldy.
