Mańǵystaýdaǵy mańyzdy joldyń 70 shaqyrymy jańartylyp jatyr
ASTANA. KAZINFORM – Mańǵystaý oblysyndaǵy respýblıkalyq mańyzy bar «Fort-Shevchenko – Taýshyq – Shetpe» avtomobıl jolynyń 91-161 shaqyrym aralyǵynda ortasha jóndeý jumystary jalǵasyp jatyr.
Jobany iske asyrýǵa 22 birlik jol-qurylys tehnıkasy men 38 maman jumyldyrylǵan.
Bıylǵy qurylys maýsymynda 26,5 shaqyrym jolda joný jumystary júrgizildi. Sonymen qatar 875 tekshe metr kóleminde jol tósemindegi aqaýlar joıylǵan.
«Joba aıasynda joldyń sapasy men qaýipsizdigin arttyrýǵa baǵyttalǵan jumystar kezeń-kezeńimen júrgizilýde. Qazirgi ýaqytta 26,1 shaqyrym ýchaskede iri túıirshikti asfaltbeton qospasynan tómengi qabat tóseldi. Barlyq jumystar bekitilgen óndiristik kestege sáıkes oryndalyp jatyr», – dep habarlady QazAvtoJoldan.
Mamandardyń aıtýynsha, jóndeý jumystary aıaqtalǵannan keıin joldyń paıdalaný merzimi uzaryp, kólik qozǵalysynyń qaýipsizdigi jaqsarady.
Aıta keteıik, buǵan deıin Jetibaı – Jańaózen tasjolynyń 114 shaqyrymynda jóndeý júrip jatqany habarlandy.
